Жерле тийишли халда хайырланылырча

Былтыр Россельхознадзорну Шимал-Кавказда регионла аралы управлениясыны келечилери бла  Къабарты-Малкъарда эл мюлкге бёлюннген  600 гектар чакълы жер  тийишли халда хайырланылырча мадар этилгенди, деп билдириледи ведомствону сайтында.

Управление эл мюлкге бёлюннген жерле законодательствогъа кёре,  тийишли халда ишленирлерине дайым  контроль этгенлей турады. Алай бла былтыр 26 минг гектарда мониторинг бардырылгъанды.  Аны кезиуюнде 250 бузукълукъ ачыкъланнганды.  Ол санда жер юлюшле сюрюлмей, кереклисича къаралмай, къауурала басып,  бош къалып тургъанлары билиннгенди.  Бир-бирлеринде уа зыбыр къалгъан-къулгъанла къуюлуп  тура эдиле. Анга заманында эс бурулмаса,  свалка къуралырына кёп керек тюйюл эди.

Специалистле болум бла шагъырейленнгенлеринден сора  жерлени иелерине жууукъ заманда бузукълукъланы кетерирге, жерлени тазаларгъа эм ишлерге  буюргъандыла.  Анга кёре 600 гектар чакълы бирде  жерлени  сюрюрге эм урлукъ салыргъа да  жарарыкъды.