Шуёхлукъну сиз къалай ангылайсыз?

Шуёхлукъ деген сёзню харкюнлюк жашауубузда не терк-терк сагъынсакъ да, аны терен магъанасыны юсюнден а  хар заманда да сагъышланмайбыз. Кёпле  танышлагъа, тенглеге да шуёхла дейдиле.  Шуёхлукъну юсюнден айтыула, таурухла, жырла, назмула жазадыла, кинола алынадыла. Бу аламат сезимни  ангыларгъа алай кёплеге насып болмагъан сунама. Элбрус районну адамларыны араларында  Шуёхлукъну сиз къалай ангылайсыз деген соруу бардыргъанбыз.

 Ёзденланы Анжела,

Элбрус районну Мокъаланы Магомет атлы сабий эм жаш тёлю чыгъармачылыкъ арасыны таматасыны орунбасары:

  -Кёпле, мен да аланы араларында,   бу соруугъа жууап бере шуёхлукъ ол адамланы араларында ышаныулукъ  сезимди, дерге боллукъбуз. Алай  кёбюсюнде шуёхлукъну сейирлери бирча  болгъан байламлыкъ бла да ажашдырадыла. Сёз ючюн, ишде  къауум адам бир жумушну жалчытып, эрттенден ингирге дери бирге тура эселе, ала аны чынтты шуёхлагъа санайдыла. Мен анга тюздю  деп айталмайма. Бирге ишлегенликге, аланы араларында бир бирге  тутхучлукъ, ышаныу болмайды. Ала уа  манга шуёхлукъну баш ышанларыдыла.

Сёз ючюн,  аллай къаршы адамларым бардыла, хар кюнден да тюбешип, хапарлашып, бир бирге сёлешип турмагъанлыкъгъа, не заманда   болушлукъ керек болса да, мен айтмай окъуна, жаныма мычымай жетериклерине ишексизме. Шуёхлукъну чынтты шартлары да арабызда жылла бла сыналгъандыла. Аллай адамларым кёп тюйюлдюле, кёп болур амалы да жокъду. Таныш адам, тенг, шуёх деген ангыламланы, мени акъылыма кёре, айтылыулары башхача, магъаналары да башхадыла.

Герийланы Виолетта,

Элбрус элни амбулаториясыны рентгенлаборанты:

-Бу адамны харкюнлюк жашауунда эсине келмеген, сагъышландыргъан, аламат сорууду. Манга шуёхлукъ ол кертичиликди, тюз ниетлиликди, ачыкълыкъды, ышаныулукъду, ангылаулукъду, керекли заманда бир бирни къатына табыла билиудю. Шуёхланы араларында берилген сёз адамны кесине заран келтирик болса да, толургъа керек сунама. 

Сабийлигинден шуёхум  тенг къызымды. Бирге ёсгенбиз, бир бирни ызын, къылыгъын да билебиз. Жашау болумлагъа кёре  ол Краснодар крайны шахарларындан бирине кёчюп жашайды. Эрттеден да бир бирибизни кёрмегенликге, арабызда байламлыкъ болгъанын сезебиз.  Алай, мен не затымы  да ышаналгъан адамларым ючеулен боладыла. Шуёхсуз жашау,  бусагъатдача,  ариу болмазлыкъ сунама. Шуёхлукъ адамгъа даражалы сезимди.

Этезланы Владимир, каратэден дунияны, Азияны эм Россейни чемпиону:

- Шуёхлукъ  бек багъалы сёздю манга. Ышаныулукъ, адамлыкъ, халаллыкъ, жан аурута билиу, жюрек ыразылыкъ дегенча ангыламладан бла сезимледен къуралады. Адам бир  жыл саннга жете келсе, жашауунда хар тюрлю инсанлагъа жолугъады. Мени оюмума кёре, жаланда чынтты шуёх жюрегинги саулай да бийлей биледи.

 Насыпха,  аллай шуёхларым бардыла. Не тюрлю сорууум, жарсыуум бла къатларына жанлашсам да, тюз ойлап, болушлукъ этедиле. Спортчу болгъаным, сабийлени юйретгеним да себепли, шуёхлукъ, тенглик да манга артыкъ багъалыдыла. Аланы болушлукълары бла тутхучлукълары жашауумда  уллу жерни аладыла. Хар тюрлю болумда да къатымда излетмей табыллыкъларын билеме. Чексиз саулукъ тежей, ыспас этеме алагъа.

Бапыналаны Илона,

Суратчы:

- Шуёхлукъ манга экинчи юйюрчады жылла бла сакълана билген байламлыкъ. Жашау бир бирден узакълагъа ашырса да, жюрек байламлыкъ сакъланады. Шуёхлукъ ол бир бирни сёзсюз ангылай билиудю. Бирча сейирлери болгъан, арада уа тёзюмлюлюк окъуна. Кёплени жылла бла келген шуёхлукълары тёзюмлюк амалтын оюлгъанларына шагъат болургъа да тюшеди.   Эгечим, къарындашым да болмагъанлыкъгъа, жанымда энчи жерни алгъан, багъалы адамларым болгъаны кюч береди.

Аппайланы Анжела,

Тырныауузну сабий китапханасыны таматасы:

- Мени ангылауумда шуёхлукъ ол бир бирден  жукъ изленмей этилген игиликди, бир бирни ангылауду, ышандыра билиудю, ачыкъ жюреклиликди. Жарсыугъа, жашау къыйын бола баргъаны сайын, адамланы халлары, къылыкълары да тюрлене барадыла. Толу ышаныр адамынг болгъаны уа керти насыпды. Мени аллай тенг къызларым бардыла.

Бир шуёхум барды да, анга не жарсыууму айтып сёлешсем да, тынгылап, эшитип, къолундан, амалындан келгенича болушургъа кюреширикди. Бек ышанама аллай керти адамлагъа. Къарындашым да   манга чынтты шуёхлукъ эте биледи. Аны бла арабыз бек къаршыды.