Жыр, тепсеу – шуёхлукъну кёпюрлери

Быйыл  жангы жылны биринчи кюнлеринде  Нальчикде  Къулийланы Къайсын атлы Малкъар къырал драма  театрда Дуния артий  комитети бла Россейни Артиадасы къурап, «Евразияны фахмулары» деген 9-чу Россей чыгъармачылыкъ эришиуню гала-концерти болгъанды.

Аны баш мураты фахмулу жаш тёлюню ачыкълауду эм не  жаны бла да болушлукъ этиудю, къырал эм халкъла аралы биригиулени эслерин сабийлени эм жаш тёлюню фахмуларына бла чыгъармачылыкъларына эс бурууду. Дагъыда  халкъланы араларында байламлыкъны кючлеп, фахмулу сабийлени бир бирлери бла шуёхлукъгъа итиндириудю.

Бу мурат бла эришиуню къураучулары фахмулу сабийлени бла жаш тёлюню устазларыны профессионал даражаларын ёсдюре, семинарла бла тёгерек столла  къурайдыла. Эришиуню сейирлерин бла муратланы  жашауда бардырыр ючюн, керекли амалланы сюзедиле.

Январьны биринчи ыйыгъында бардырылгъан эришиулеге бизни республикадан да кёп сабий къатышханды.  Элбрус районну Къулийланы Къайсын атлы маданият юйюню «Сопрано плюс» вокал-креатив студиясыны сохталары да  бу эришиулеге бу жол  бла жетинчи кере жетишимли къошулгъандыла.  Студияны таматасы Гузиланы Дженнет  а быйылдан башлап жюрини къауумуну вокалгъа къарагъан келечиси болгъанды. 

«Сопрано плюс» студияны фахмулу жырчылары эришиуге жууаплы хазырланнгандыла. Анга кёре эсеплери да бийикдиле.

- Быйыл бу эришиуледе Индиядан келген артистлени аламатлыкъларын энчи чертип айтырчады. Бизни сабийле башха къыралны маданияты бла шагъырейленнгенлерине бек къууаннгандыла. Сейир этип, аланы жырларына тынгылагъандыла, тепсеулерине бла юс кийимлерине къарагъандыла. Мени оюмума кёре,  быллай конкурсланы уллу магъанасы барды. Кёп халкъланы бла къыралланы сабийлерини бла жаш тёлюсюню араларында танышыу, байламлыкъ бла шуёхлукъ жаратылыу махтаулуду, - дейди Дженнет Рамазановна.

«Сопрано плюс» студиябызны сохталары кеслерини аламат фахмулары бла кёплени кёллерине жеталгъандыла. Ахматланы Айшат «Къыш тюшю» деген композициясы бла эришиуню келечилерин  къууандырып,  1-чи жерге тийишли болгъанды. Эльмира Шогенованы «Мени шуёхум суратчы эм поэтди» деген композициясы да махтаугъа тийишли эди, ол да 1-чи жерге чыкъгъанды. Гызыланы Айла «Сайла» деген жыры бла, Марьям Кокова уа «Ахыргъы кере» деген жыры бла 2-чи жерге тийишли болгъандыла. 

Бийик даражада бардырылгъан эришиуледе алчылыкъгъа тийишли болуу жаш жырчыларыбызны бла аланы устазларыны тутхан ишлерине битеу жюреклери бла берилгенлерине шагъатлыкъ этеди.