Уллу, гитче да заманларын зауукълу ётдюргендиле

Кёп болмай «Ата журтну къоруулаучуну жылына» аталып  Герпегежге кирген жерде кёлде «Къыш чабакъ тутуу» деген аты бла  акция болгъанды. Анга иги кесек адам жыйылгъандыла. Ол санда энчи аскер операцияны ветеранлары, бусагъатда борчларын толтургъан  аскерчилени юйдегилери, «Династия героев» проектни келечилери эм башхала да, деп билдириледи  Черек районну администрациясыны пресс-службасындан.

Юйюр бла солургъа онг тапдыргъан проект Герпегежни администрациясыны   башламчылыгъы бла бардырылгъанды.  Аны къураргъа Черек районну администрациясы,  Жаш тёлю араны келечилери, волонтёрла эм элде жашагъанла болушхандыла.

 Ол кюн жыйылгъанланы плов, къууурулгъан чабакъ, чай  дегенча татымлы ашарыкъла бла ичгиле  сакълагъандыла.

Аскерчиле юйюрлери бла бирге заманларын  табийгъатда ётдюрюрге, шуёхлары бла тюберге  онг тапханларына бек ыразы болгъандыла. Ол  халлерин игилендириуде да ахшы себеплик этгенди.

Бютюнда уллу зауукълукъ а сабийле тапхандыла. Ала сау кюнню,  эрикмей,  бир бирден уллуракъ чабакъ тутаргъа кюрешгендиле, ол себепден кечгиге  дери кишини кетериги келмегенди.