Абаданлагъа бла гитчелеге – башха жорукъла

«Нальчик» спорт арада къатыш единоборстволадан республиканы чемпионаты бла биринчилиги бардырылгъандыла, анда округ даражада сермеширге эркинлик ючюн, жюзден аслам спортчу эришгендиле.

Эришиулеге республикабызны эм кючлю жаш гёжефлери жыйылгъандыла, ала жыл санларына кёре беш къауумгъа юлешиннгендиле, жорукълагъа тийишлиликде аланы хар биринде чекле бардыла. Сёз ючюн, гитчелеге бир бирлерин башларына урургъа жарамайды, аслам магъана тутушуугъа бериледи. Оналты жылдан абаданла уа сермешген да этедиле. Баш судья Залим Кушхаунов ангылатханыча, абаданла ючминутлукъ юч, жашыракъла  юч минутлукъ - эки, гитчеле уа бир тюбешиу бардырадыла. Хорлатханла андан ары кюрешден чыгъарыладыла.   

Спортну бу тюрлюсюнде гёжефледен кюч-къарыу, бийик хазырлылыкъ да изленеди. Хорламгъа итиниулюгю уллу болгъан къытхан кезиуле мында сейир тюйюлдюле. Тренерлени да белгилерге тийишлиди, спортчулары сермешгенде, ала бир такъыйкъаны да ычхындырмагъанлай, тюз приёмну эсге салгъанлай, кёл этдиргенлей турадыла. Спортчуларыбыз сабийлерибиз кибикдиле, хар тренер да анда юйреннгеннге уллу къыйын салады, деп белгилейди тренер Жантудууланы Азамат.

Жылдан-жылгъа республикабызда къатыш единоборствола бла кюреширге сюйгенлени саны кёбейе барады, аланы усталыкълары да ёседи. Анга шагъатлыкъны уа былтыргъы эсепле этедиле, гёжефлерибиз къыралда, дунияда да аслам даражалы эришиуледен хорламла бла къайтхандыла. Бу жазда уа республикада биринчи кере Россейни ММА-дан биринчилиги бардырыллыкъды.