Жангы окъуу жылгъа – жангы мектепге

Нальчикде онекинчи мектепни къурулушу бошала турады, эски мекямда туруу къоркъуулуду деген оноугъа келип, ол кетерилгенди. Жангысында сегиз жюз окъуучугъа жер боллукъду.

Мектеп Профсоюзная орамда орналыпды,аны жангы мекямы битеу да 14 минг квадрат метр жерни алады. Кюнню халы аман болгъан кезиуледе ишле мектепни ичинде бардырыладыла. Баш инженер Марат Афашагов билдиргенича, ала бусагъатда оборудованияны орнатадыла, столла, шинтикле саладыла. Тёгерегин тапландырыу, тышын айбатландырыу жумушла да ахырына жетдириле турадыла. Мекямны юч къатысында кабинетле, коридорла хазырдыла, жылыу да берилгенди. Атлауучланы буруулары тот этмеген темирдендиле. Мектепни хар бёлюмюню тюрсюню, аны кёрюмдюсю да бир бирге ушамазча башха боллукъдула. Сабийле спорт бла кюреширча онгла тапдырыугъа да эс бёлюннгенди, чабарча, футбол, волейбол ойнарча, жарау этерча жерле бардыла. Къурулушда жетмиш эки адам ишлейдиле, болжал  жангы окъуу жылгъа дериди. Жангы мекям «Билим бериу» деген миллет проектге кёре ишленеди, аны къурулушу былтыр жайда башланнганды.