Сабийлеге – эшикде жарау этерча майдан

«Радуга» санаторийде Русгидрону башламчылыгъы бла эшикде жарау этерча майдан ачылгъанды. Мында сабийлеге кёп тюрлю тренажерла бардыла, ала жарауну жауун, къар жаугъанда да къоймазча, башы жабылгъанды.

- Биз сабийле бла быллай майданыбыз болуруна мурат эрттеден да эте эдик. Нек дегенде мында багъылгъан балачыкъланы араларында чекленнген онглары болгъанла да бардыла. Битеу бу затланы эсге алып, ала аякъларын, къолларын да кючлерча тренажёрланы сайлагъанбыз, - дейди араны педагогика бёлюмюню башчысы Глашланы Зухура.

Русгидрону себеплиги бла быллай керекли ишни тамамларгъа онг чыкъгъанына къууанырчады. Общество адамланы жашау болумларын игилендириу жаны бла  жандауурлукъ бла кюрешгенли юч жыл болады, «Радугагъа» да дайым эс бёлгенлей турады. Русгидрону жамауат бла байламлыкъла жюрютюу жаны бла ишчиси Будайланы Лейля билдиргенича, ала санаторийни китапханасын организацияны себеплиги бла чыгъарылгъан сабий китапла бла байыкъландыргъанлай турадыла. Андан тышында, сабийле ойнагъан отоугъа чекленнген онглары болгъан балаланы айныуларына болушхан илляула да алыннгандыла.

Алай бла озгъан  жылны ичинде Русгидрону бёлюмю регионну медицина эм билим бериу учрежденияларына, спорт эм жамауат биригиулерине юч миллон сом чакълы болушлукъ этгенди.