Эл мюлк жерни таза тутаргъа керекди

Россельхознадзорну Шимал Кавказда бёлюмюню келечилери бу айны онбиринчисинде Прохладна районда Къарагъач элни къатында къадар жерде кир-кипчик тёгюлюп тургъанын эслегендиле. Тинтиулеге кёре, ол эл мюлкге жараулу сабан эди, аны 3,5 гектарында уа къалгъан-къулгъанла чачылып эдиле.

Ведомствода айтханларыча, ол ушагъыусуз ишди, жууапсызлыкъны, уллу кёллюлюкню шартларыдыла. Кир-кипчик эл мюлк жерлеге хата салмай къоймайды, аны ишге жарамазча этерге боллукъду, ол себепден алайны мычымай тазаларгъа тийишлиди. Анга кёре ол тийрени иесине эсгертиу этилгенди. Инспекторла ызы бла къайтып баргъанларында, ол инсан алайны тазалап башлагъанын эслегендиле.