Сынауланы болжаллары белгиленнгендиле

Билим бериу эмда илму жаны бла надзорлукъ этген федерал служба 2025 жылда Бир къырал экзаменлеге къатышырыкъла ары барыргъа эркинлик алыр ючюн заявленияларын биринчи февральгъа дери жазаргъа тийишли болгъанларын эсгертеди. Быйыл мектеплени бошарыкъла аны кеслерини окъугъан жерлеринде берирге эркиндиле. ЕГЭ-лени экстерн амал бла жазаргъа излеген окъуучула уа заявкаланы къырал аккредитациялары болгъан (кеслерини сайлауларына кёре) мектепледе берирге боллукъдула. Алгъа жыллада школну бошагъанла уа аланы регионну билим бериу управлениясы белгилеген жерледе жазаргъа эркиндиле.

Окъуучула заявкаларын кеслери неда аланы ата-аналары аны кимлигине шагъатлыкъ этген документге тийишлиликде жарашдырыргъа керекдиле. Саулукълары  бла байламлы энчиликлери неда сакъатлыкълары барлагъа уа психология-медицина-педагогикалы комиссияны эсгертиулери бла къол салыннган документ неда аны копиясы керек боллукъду. Мектеплени башха жыллада выпускниклери да школда  билим алгъанларына шагъатлыкъ этген эмда къол салыннган къагъытны кёргюзтюрге тийишлидиле.

Рособрнадзор 2025 жылда бериллик Бир къырал сынауланы болжалларын да тохташдыргъанды. Алай бла, аны мурдорлу урумгъа дери кезиую 21 мартдан 21 апрельге дери бардырыллыкъды. Мурдорлу бёлюмю 23 майдан 23 июньнга дери боллукъду. Къошакъ уруму уа, хар замандача, сентябрьге тюшеди. Ол а аны 4-ден башлап 23-сюне дери озарыкъды. Былтырча, выпускниклеге кеслери сайлап берген дерследен биринден сынауну жангыдан  жазаргъа эркинлик да барды.

Аллай онг жашлагъа бла къызлагъа 3 эмда 4 июльда берилликди.

Бир къырал сынауланы мурдорлу уруму быйыл, белгилегенибизча, 23 майда башланырыкъды. Ол кюн сабийле тарыхдан, химиядан эмда орус литературадан жазарыкъдыла ишлерин.

Математиканы мурдорлу (235 минут) эм профильли (180 минут) тюрлюлери да 27 майгъа тохташдырылгъандыла. Выпускникле аслам халда къатышхан сынау – орус тил да, математикача, быйыл бир кюнню ичинде бардырылып къаллыкъды.

Анга уа сабийле 30 майда жыйыллыкъдыла эмда ол юч сагъат бла 30 минутха дери созуллукъду. 

Экинчи июньда уа ала обществознанияны бла физиканы берликдиле. Биологияны бла географияны сайлагъанла уа экзаменлерин 5 июньда жазарыкъдыла. Андан сора да, бу кюнде тыш къыраллы тилледен сынауланы «жазыу» кесеклери бардырыллыкъдыла.

Информатика бла тыш къыраллы тиллени «Сёлешиу» урумлары уа эки кюнню ичинде боллукъдула – 10-11 июньда. Дерслени барысындан да экзаменлеге къошакъ кюнле уа 16 эмда 23 июньнга белгиленнгендлиле. Информатикадан да сынауну мектеплени бошагъанла тёрт сагъат чакълы заманны (235 минут) жазарыкъдыла.

Барыбыз да билгенликден, борчлу халда сабийле эки экзаменни бередиле – орус тилден бла математикадан. Аладан сынауну тийишли мардагъа жазмагъанлагъа аттестат берилмейди. Мектеплени ал жыллада бошагъанлагъа уа математиканы жаланда профильли тюрлюсюне барыргъа жарайды, аны мурдорлу тюрлюсюне берирге аладан заявление алынмайды, нек дегенде аллай эркинликлери жокъду.

РФ-ни Жарыкъландырыу министерствосуну буйругъуна тийишлиликде Бир къырал сынауладан алыргъа жарагъан эм аз балланы тизмеси да жарашдырылгъанды. Сёз ючюн, орус тилден бла обществознаниядан ол 42 баллды. Орус литература бла географиядан а эм азындан 40 балл алыргъа керекди. Математикадан бла физикадан – 39,информатикадан а 44 баллды. Алай эсе да, быллай эсепле жаланда выпускник  сынауну бергенин ачыкъларыкъдыла ансы, даражалы бийик окъуу юйлеге алагъа кёре кирирге къыйын боллукъду. Аны себепли жаш тёлюбюз, ЕГЭ-леге кереклисича хазырланып, алада болдургъан эсеплери бла бизни быйыл да, былтырдан кем болмай, къууандырырла деген ышаныулукъдабыз. Озгъан окъуу жылда башха-башха дерследен жюз баллагъа алты таулу сабий тийишли болгъаны уа, айхай да, аланы кеслерини, устазларыны да жетишимлери болуп къалмай, барыбызны да кёлюбюзню кётюрген шарт болгъанды.

Трамланы Зухура.
Поделиться: