Жолла эмда кёпюрле жангыртыллыкъдыла![]() Жыл башланнганы бла Къабарты-Малкъарда жолчула да ишни къолгъа алгъандыла, быйыл тамамланыллыкъ борчланы болжалгъа салмай белгилегендиле, талай объектде уа мадар этип окъуна башлагъандыла. Республиканы Транспорт эмда жол мюлк министерствосундан билдиргенлерича, 2025 жылда битеу да 26 объект жангыртыллыкъды, аланы барыны да узунлугъу 55 километрден артыкъды. Ишле «Жашау этерге инфраструктура» миллет проектни чеклеринде эмда регионну ахчасына бардырыллыкъдыла. Сагъынылгъан объектле онбеш шахарда бла элдедиле. Ала магъаналы жолладыла, саулукъ сакълау эмда билим бериу учреждениялагъа, маданият эмда спорт объектлеге элтедиле, муниципалитетлени эмда эллени араларында байламлыкъланы жалчытадыла. Алай бла Прохладна районда Новопавловск-Прохладный-Моздок трассаны Прохладный шахарны ичинде 6,4–километрлик кесегине ремонт этилликди, дегендиле министерствода. Зольск районда уа Малка - Ингуш жолну 8,1–километрлик участкасы тап халгъа келтирилликди. Ишле эки орамда бардырыллыкъдыла, алада юч орта школ, биришер сабий сад, межгит, фельдшер-акушер пункт, полицияны бёлюмю эмда элни администрациясы орналадыла. Май районда да этер иш кёпдю: подряд организацияны адамлары Александровская - Озрек жолну эмда Нальчик - Майский трассаны Октябрьское элден башлап Прохладный – Эльхотово жолгъа дери кесегин жангыртыргъа умутлудула. Терк районда уа тизмеге беш объект тюшгенди. Экиси Терк сууда кёпюрледиле: бирини узунлугъу - 162, экинчисини уа 180 метр болады. Дагъыда Дейское элде озгъан жылны ахырында жангыртылып башлагъан орамда иш андан ары барлыкъды. Ызы бла уа Дейское - Тёбен Курп жолну Осетия бла чекге дери 5,8–километрлик кесегинде эмда ол трассадан Огъары эм Тёбен Курп эллеге баргъан жолда (4,5 километр) мадар этип башларыкъдыла. Урван районда быйыл онтёрт километр чакълы жолла жангыртыллыкъдыла. Тизмеге эки объект тюшгенди: Морзох - Шитхала эмда Эски Черек - Жемтала-Сукан-Су. Чегем районда Булунгугъа баргъан жолда уа иш тохтамайды. Аны узунлугъу 25 километрди, кесинде да тогъуз кёпюрню жангыртыргъа тюшерикди. Быйыл дагъыда Каменканы жанында 1,8–километрлик жолгъа да ремонт этилликди. Элбрус районда уа тизмеде бир объект барды: Нейтрино обсерваториягъа баргъан 1,5–километрлик жол. Быйыл ол тынгылы жангыртыллыкъды. Министерствода айтханларына кёре, ишлени барыны да къагъыт жумушларын ала былтыр окъуна тындыргъандыла, аны хайырындан тюз жыл башланнганлай, кюн чырмамаса, жер-жерледе мадар этип тебирерикдиле. Сёз ючюн, бу кюнледе Майский - Урожайное жолну Терк сууда кёпюрюнде ишле башланнгандыла. Бу объектни узунлугъу 162 метрди, ремонт баргъан кезиуде машинала аны къатында болжал халда ишленнген кёпюр бла жюрюйдюле. Специалистле уа энди кёпюрню чачып, чыпынларын, мурдорун да кючлендирликдиле, жан-жанларын суу ашамазча тынгылы бегитирикдиле, жангы кёпюр сюеп, хар несин да жик жиги бла жарашдырлыкъдыла. Ишни быйыл кюзню ахырында бошаргъа, дейдиле.
Поделиться:
Читать также:
12.02.2025 - 16:04 →
Къойчулукъну айнытыуну юсюнден сёлешиннгенди
12.02.2025 - 15:56 →
Бизде къыз къачырыуну энчиликлери
12.02.2025 - 12:53 →
Узун жашауну бир къауум амаллары
11.02.2025 - 09:00 →
Эс бурдурурча – къоркъуулу сурат
11.02.2025 - 08:49 →
Кечеледен биринде къыйын ауруула тюшюрюледиле
|