Саулукъ сакълауну айнытыр муратдадыла

Жашларыбыз бла къызларыбыз окъууда, ишде да,  бирсиледен артха къалмай, юлгюлю болсала, ол шарт бизни барыбызны да кёллендиреди. Арт кезиуде аланы асламысы школну  бошагъан кезиулеринде саулукъ сакълау бла байламлы ызда усталыкъланы сайлагъанча кёрюне эсе да, ол атламны ала жюреклерини излемлерине кёре этгенлерин ангылагъаныбыз да ышаныулукъну туудурады.

Медицина бла байламлы кесини жашауун къашхатаучу жаш Туменланы Мурадин да этерге сюйгенди. Анга уа сабийлигинден да бу жаны бла атасы Алимни экиге айланнган эгечлери Мокъаланы Сафият бла Валя болгъандыла. Бу тиширыуланы уа сынамлы, билимли-окъуулу тиш докторла болгъанларын а республикабызда кёпле биледиле.

Мурадин да аланы юслеринден хапарланы юйде, бирсиледен да эшите, къалай ишлегенлерин, алларына келгенлеге болушлукъну къалай этгенлерин кёре, алача жамауат хурметлеген врач болургъа излегенди. Анасы  Мариям ол башха ызда окъуса сюйгенин билдиргенинде да, жюреги алгъадан да сайлагъан жолну алышмагъанды, анга кертичилей къалгъанды.

Ары дери уа ол мектепде иги окъуп, биологиядан бла химиядан а, дерследен тышында да, Нальчикде «СМАРТ» арагъа жюрюгенди. Аны химиядан юйретген эмда ол жаны бла кёп затха тюшюндюрген Токумаланы  Аннагъа уа бюгюн да ыразылыгъын билдиргенлей турады. Нек дегенде устаз сабийни къалай кёллендиргени энчи магъананы тутханы  белгилиди.

Андан сора да, анга юлгю тамата эгешчиги Алина болгъанды. Ол да, стоматологга окъуп, Москвада клиникаладан биринде уруна,  сынам да жыйышдыргъанды. Ызы бла республикагъа къайтып, билимине тийишлиликде ишлейди.

– Экиси бирге хапар айтсала, бир жаны бла аланы ангылагъан къыйын эди – медицина терминле, анга кёре башха ангыламла да. Алай эсе да, бири башхасын окъууну-билимни эбине тюшюндюргени уа манга, анагъача, хычыуун эди. Аланы ол къылыкъларына къууанып, кёлленип да тургъанма. «Биринчи-экинчи курслада мени да ангыламагъан затларыма тюшюндюрген биреулен болса эди, андан да иги окъурукъ эдим», – деп, эгешчиги Мурадиннге аз кере айтмагъанды,–деп эсгереди аналары Мариям а.

Алай бла Тумен улу КъМКъУ-ну медицина академиясыны стоматологланы хазырлагъан бёлюмюнде жетишимли окъугъанды. Болсада эм алгъа къыйналгъанын да жашырмайды. Китапладан, компьютерден да башын ёрге кётюрмей, окъуууна  аз да уллу кёллюлюк этмегенди. Аны хайыры бла уа айырмалы да болгъанды.

Аны бла да чекленмей, ауарасын ата-анасына жетдирмезге кюреше, экинчи курсда болгъанында кесине иш да тапханды. Дуния пандемия болумгъа тюшгенинде да, саусузлагъа болушлукъ этгенлей тургъанды. Тамата курслада болгъанында уа,  Нальчикни клиникаларындан биринде урунуп, сынам да жыйышдыргъанды.

Бюгюнлюкде уа Мурадин Москвада Россейни Саулукъ сакълау министерствосуну Стоматология эмда жаякъ сюек-бет ара илму-излем институтуну ординатурасыны экинчи курсунда окъуйду. Анда билимин ёсдюргени бла бирге «ПрезиДент», «Саулукълу ышарыу» атлы клиникалада уруна, сынамын да байыкъландырады. Алада уа ол белгили россейли политиклени, къырал  къуллукъчуланы саулукъларына бакъгъан врачладан кёп тюрлю ышаннгылы амаллагъа, ортодонтологиядан жангычылыкълагъа, бу бёлюмню жашырынлыкъларына да тюшюнеди.

Ол кесини жашау нёгерин Гамаланы Динараны да КъМКъУ-да окъугъан заманында таныгъанды. Ала алгъаракълада бир юйюр къурагъандыла.  Къызчыгъ а университетни медицина академиясыны «Багъыу иш» бёлюмюнде билим алгъанды. Бюгюнлюкде ол да къыралыбызны ара шахарында РФ-ни Президентини ишлерин жюрютюу «Ара къырал медицина академияны» (СПО ЦГМА) ординатурасыны биринчи курсунда окъуй турады. Аны бла бирге клиникаларындан биринде врач-ординатор болуп ишлейди. Мураты толса, дерматология, венерология эмда косметология жаны бла ахшы доктор болур акъылдады. Аны бла да чекленмей, ол фельдшерликни, волонтёрлукъну да бардырып тургъанды. Студент кезиуюнде Биринчи Чегемни район больницасында да ишлегенди.

Кертиди,  ала ата юйлерине тансыкълыкъ сезимлерин да жашырмайдыла. Алай эсе да, бири бирине ишде, окъууда, юйде да билеклик этип, бири башхасыны акъылына тюшюнюп жашайдыла. Окъууларын  жетишимли бошап, сынам да жыйышдырсала уа, туугъан республикаларына къайтып, билимлерин мында хайырланыр, жамауатыбызгъа болушлукъларын тийдирир умутдадыла. 

Аны бла бирге уа алагъа жюреклери излеген усталыкъгъа кёре окъургъа, ара шахарыбызда сынам алыргъа, ёсерге да онг берген ата-аналарына жюрек ыразылыкъларын да айтадыла. Акъ халатны кийип, атына «врач» деп айтдырыргъа излеген адам не жаны бла да терен ангылаулу болургъа кереклисине ийнана, аланы ышаныулукъларын да алдамазгъа кюрешедиле.

Трамланы Зухура
Поделиться: