Жазыуунг башха бла эсе…Булутлу жай эрттенлик Жамиляны жарсыулу халине болмагъанча бек келише эди. Сюйген жашы Сагъыт бла айырылгъанлы, къызны бир жукъ да къууандырмайды. Хар не да, хар ким да анга эриши кёрюнедиле. Сюйген ишинден окъуна зауукълукъ табалмайды. Аны себепли эки ыйыкъгъа солуу кюнле алып, ол таулагъа кетеди. Телефон тутмагъан, адам болмагъан гитче юйчюкде аны жюреги хошлукъ табыпды, къарамы уа бийик къая жухланы башларындагъы мамукълу булутчукъланы санайды. Алай бир такъыйкъадан, эсине биягъы ол кюн тюшюп, аны мудахлыкъ бийледи. …Сагъыт Москвадан къайтхан кюн, Жамиля, ишден эрттерек чыгъып, омакъ жыйрыгъын кийип, сюйгенине тюберге ашыгъып эди. Аланы тойларын сау эл сакълайды. Жаш да ата-анасына къысха заманны ичинде юйюрлю болур умутун билдирген эди. Элге келип, юйюндегилени да ашыгъышлы кёрюп, ол артха, шахаргъа, тебиреди. Анга Жамиля бла сёлеширге керек эди. Белгилеген жерге келгенинде, къыз – алыкъа жокъ. Ушакъны къалай башларыгъыны сагъышын эте, ол жаяу жолчукъ бла ёрге-энишге жюрюйдю. Жарым сагъатха кечикген, жюреги насыпдан толгъан къыз а чабып жетди. – Къалай игиди къайтханынг, мен алай насыплыма, – деди Жамиля. Сагъыт да жарыкъ болургъа кюрешди. Ала, ашханагъа кирип, адамладан ташаракъдагъы столну сайладыла. – Мени тюшде да ауузланыргъа заманым болмагъанды, сени уа? – деп, къыз ашыгъышлы болду. – Манга да кесинге сайлагъанны ол, – деди Сагъыт. Сайлауну этип, сюйгени бла андан ары хапар бардырыргъа хазыр къыз, жашны халинде тынгысызлыкъны эслеп: – Не болгъанды? Тынчлыкъсызча кёрюнесе, – деди. Жаш бир кесек тынгылап: – Жамиля, сен бек иги, ариу да къызса, кимни да насыплы эталлыкъса. Алай ол адам мен болмам, къарайма да. Мени сакълап тургъанынг бек хычыуун кёрюне эди, алай, кюз артында мен бир къыз бла танышханма, къалай эсе да, ол кесин сюйдюртгенди. Ары дери аллай сейир сезимле мени бир да бийлемегендиле. Баям, сюймеклик дегенлери ол болур. Сен да жашауунгда жюрегинг бла сюйюп, сенсиз бир кюн да чыдаялмазлыкъ жашха тюберсе деп ийнанама, – деди. Жамиля аны айтханын башына сыйындыралмай, мыйысы атылыргъа жетгенча болуп, ашхананы эшиги таба атлады. Алай, кёзю-башы тёгерек айланып, аякълары мамукъгъа батдыла… Эсин жыйып уяннганында уа, врач юсюне сюелип эди. Къайда болгъанын иги ангылаялмагъан къызны палатасына тамата эгечи чабып кирип: – Доктор, не болгъанды? Бир айтыгъыз, – деп, Жамиляны баш жанында тохтады. – Къоркъурча зат жокъду, кете туруп манга бир къайтырсыз, – деп чыкъды доктор. – Кирирге боллукъмуду, – деп къызны эгечи эшикни къакъды. Врач жаш, ёрге къобуп, аллына барып: – Сиз артыкъ къайгъы этмегиз, алай Жамиляны жюрегине бакъдырыргъа керекди. Дагъыда анга аз да жарсыргъа жарамайды. Бу жолгъа дери былай онгсуз болуп билемисиз аны? – деп сорду. – Угъай, жюрегинден тарыгъып эшитмегенме. Ата-анабыз эртте ёлгенлери себепли, аны да, къарындашымы да мен ёсдюргенме. Биз экибиз элде жашайбыз, Жамиля уа ишлеген, жашагъан да шахарда этеди. Юйге солуу кюнледе келиучюдю. Алай аберим къыйнайды деп, бир заманда айтмагъанды. Хайт деген 25-жыллыкъ къызны неси аурургъа боллукъду?. – Аны биргесине «скорыйде» келген жаш а ким эди? – деп сорду доктор. – Сагъыт эди. Ала школдан бери да бир бирлерин сюйюп, тойларына хазырлана айланадыла. Ол Москвада ишлеп, энди къайтханды, – деди. Врач ингир ала, юйге кетерден алгъа, Жамиляны палатасына кирип: – Къалайса? Берилген дарманланы ичип тур. Абери керек болса, медсестраны чакъырыргъа уялма деди. – Мени къачан жибераллыкъсыз юйге? – деп сорду къыз. – Алыкъа аны юсюнден айтыргъа эрттеди. Бир ненча кюнню багъаргъа керекди. Жюрегигизге да энчи багъыу амалла боллукъдула. Аны себепли бир затха къайгъы этмей турургъа кюрешигиз. – Ол алай тынч болса уа, доктор, – деп, Жамиля бир жанына бурулду. … Ахмат бу больницада врач болуп ишлегенли 10 жыл чакълы бола эди. Аны адамлагъа онг тапдырыргъа, кёллендирирге итиниулюгю кёплеге белгили эди. Аны себепли Жамиляны тёгерегинде айланнганына да киши артыкъ уллу сейир этмеди. Алай бу жол а аны сейири усталыгъыны чеклеринден чыгъып эди. Биринчи кёргенинлей да, къыз аны жюрегине тюйрелгенди. Алай аны сюйген жашы болгъаны себепли ол кесин къалай жюрютюрге билмей эди. Болсада аны Жамиляны кёре бир да келмегени уа Ахматны бек сейирсиндире эди. Сора, къыз кетер кюнню аллында жаш хапар билирге таукел болду. – Эгечинг айтханнга кёре, жууукъ заманда тоюгъуз боллукъду да, жюрегигиз къууана жашарсыз деп ийнанама. Тынчлыкъ бек керекди санга. Ишден да бираз солусагъыз иги боллукъду, – деди врач. – Той боллукъ тюйюлдю, алай ишден бир кесек солургъа дегенигизни уа жаратдым, – деп, Жамиля мудах кёзлерин кётюрдю. Ахматны ол жангылыкъ къууандырды. – Да ол жаш киеулюк тюйюлмюдю да? – деп сорду. – Энди угъай. Аны тою башха блады. Энди уа мен солургъа сюеме, – деди къыз. Доктор чыгъып, кабинети таба тебиреди. Эшитгени аны болмагъанча къууандыргъанды... Эрттенликде Ахмат Жамилягъа къагъытларын берирге палатасына кирди. Тамата эгечи аны хапчуклерин жыйышдыра тура эди, къыз а – жокъ. – Къайдады саусуз? – деп сорду доктор. – Тышына чыкъгъанды, бусагъат къайтады, – деди ол. Ала да хапарны бардыра тургъанлай, къыз эшикни шош ачып кирди. Ахмат андан кёзюн алалмай иги кесек турду. Сора: – Ма, къагъытларынгы ал. Анда жазылгъанны барысын да толтуруп, бир айдан къайтырса, – деди. – Охо, сау болугъуз, кёрюрбюз, – деп, Жамиля документлени алды. – Сизге тау хауа бек иги боллукъду шёндю. Керек эсе, солурча юйчюк бла болушаллыкъма. Шуёхуму таулада аллай юйю барды, – деп, доктор, жууапны да сакъламай, телефон бла тенгине сёлешип тебиреди. Эгечле, сейирсинип, бир бирге соруулу къарадыла. – Охо, сакълайма. Къара да, сёлеш артха, – деди Ахмат. – Бош болгъан кюнле къайсыла болгъанларына къарап, бусагъат билдирликди, – деп къошду. Доктор палатадан чыкъгъынчы, шуёху артха сёлешип, хапар билдирди. Жамилягъа бир ыйыкъгъа тауда солургъа барыргъа онг чыкъды. …Булутлу жай эрттенлик Жамиляны жарсыулу халине болмагъанча бек ушай эди. Къарамы бийик къая жухланы башларындагъы мамукълу булутчукъланы санайды. Ол эгечи бла бери келгенли беш кюн бола эди. Телефонсуз, шош акъгъан черекни жагъасында битеу сагъышлары ол суу бла бирге саркъгъанча болгъан Жамиля жангыдан туугъанча сезе эди кесин. Тамата эгечи да, анга кёл этдире, врач жашха эс бёлюрге чакъыра эди. Алай бла дагъыда эки кюн озду. Къызланы кетер заманлары жетгенде уа, ары шуёху бла Ахмат да келди. Къонакъла сакъламагъан Жамиля бир кесек абызырады. – Сиз а къайдан чыкъдыгъыз? – деп сорду ол сейирсинип. – Да, биз да шахардан бир къауум сагъатха башыбызны алып къачханбыз. Сора сизни да ала барырбыз деп сагъыш этгенме, – деди жаш. Алай бла жолгъа ингирде чыкъдыла. Бир жарым сагъат чакълы баргъанлай, жолда аварияны кёрдюле. Эки машина урулуп, бири уа иги да узакъгъа чартлап тура эди. Халкъ, къазауатха къалып, аладан адамланы чыгъара эдиле. Сора Ахмат тенгине машинаны тохтатыргъа буюруп, чартлап чыкъды да, чабып барып, кимге бегирек болушлукъ кереклисин сорду. Аны узакъда машинагъа ашырдыла. Ол алайгъа жетгенде, жерде бир тиширыуну эследи. Барып, боюнуна тийиди. Жарсыугъа, аны жюреги урмай эди. – «Скорыйге» сёлешген бармыды? – деп соруулу къычырып, ол машина ичиндеги жашха жан атды. – Сауду, – деп, терк окъуна аны халин тинтип башлады. Къан жугъу болгъан жашны ким болгъанын эсине тюшюралмай, бир кесек сагъыш этип, ол аны эсин къайтарырча мадарлагъа кёчдю. «Скорый» жетерге, жаш кесине келген эди. Аны ары салыргъа болушхан кезиуде Ахмат эсине тюшюрдю къайда кёргенин аны: Жамиля бла больницагъа келген жаш эди ол. Аны биргесине болгъан къызны ёлгени уа аны бек жарсытды. Жашла алайда бир сагъатдан аслам тургъан кезиуде, къызла кеслерине жер тапмай машинада олтуруп эдиле. – Саумудула ол адамла? – деп сорду Жамиля. – Бир машинадагъы тиширыу, жарсыугъа, ёлгенди. Барысын да алып кетгендиле. Мен жангылыргъа да болурма, алай эр кишиледен бирин ол кюн сени, Жамиля, больницагъа келтирген жашха ушатдым, – деди Ахмат. Ол такъыйкъада къыз, мудах болуп: – Аллах болсун нёгери, олду къайда да сакъларыкъ, – деп, ахтынып, терезеге бурулду… Бир жылдан а аланы Ахмат бла тойлары болду.
Поделиться:
Читать также:
12.02.2025 - 16:04 →
Къойчулукъну айнытыуну юсюнден сёлешиннгенди
12.02.2025 - 15:56 →
Бизде къыз къачырыуну энчиликлери
12.02.2025 - 12:53 →
Узун жашауну бир къауум амаллары
11.02.2025 - 09:00 →
Эс бурдурурча – къоркъуулу сурат
11.02.2025 - 08:49 →
Кечеледен биринде къыйын ауруула тюшюрюледиле
|