Халкъны жигерлигини, иш кёллюлюгюню белгиси болгъанды

1934 жылда январьда Къабарты-Малкъар эл мюлкде жетишимлери, колхозланы бла совхозланы ишлерин кючлеу жаны бла жумушланы тамамлагъаны эмда къыралны аллында алгъан борчланы толтургъаны ючюн Ленинни ордени бла саугъаланнганды эмда партияны XVII  съезди атлы битеуроссей къызыл къангагъа жазылгъанды.

 Ленин атлы орден  1930 жылда апрельде тохташдырылгъанды. Ол кезиуде совет къыралда андан даражалы къырал саугъа болмагъанды. Алай бла уа Къабарты-Малкъар автоном область бу бийик къырал саугъа бла биринчилени санында белгиленнгенди дерге боллукъду.

Ара толтуруу комитетни бир-бир республикаланы Ленинни ордени бла саугъалауну юсюнден бегими 1934 жылда 3 январьда чыгъарылгъанды. Бюгюнлюкде документ Россейни тарых обществосуну электрон библиотекасында басмаланыпды. Анга кёре КъМАО бла бирге Татар автоном совет социалист республика, Запад-Сибирь край, Москва область, Горьковский край эм Кърым автоном совет социалист республика тийишли болгъандыла.

Бу бийик саугъагъа Къабарты-Малкъар автоном область тирликни жыйыуда жетишимлери ючюн белгиленнгенди. Ол а республика къыралны аш-суу къоркъуусузлугъун жалчытыугъа этген къошумчулугъуна шагъатлыкъ этеди эмда   халкъны иш кёллюлюгюню белгиси болгъанды.

Анга уа 1934 жылда колхозлада урунууну 17,7 мингден аслам ударниги болгъаны да шагъатды. Аладан 3 мингден асламы тиширыула эдиле.

Ленинни орденин Къабарты-Малкъаргъа 1934 жылда 15 майда бергендиле. Анга аталгъан къууанчлы жыйылыугъа 15 мингден аслам адам жыйылгъан эди. Къыралны атындан  жамауатны СССР-ни Ара толтуруу комитетини секретары А. Енукидзе алгъышлап сёлешгенди.