Чагъырны къолдан сатып алмагъыз

Алгъаракъда озгъан Жангы жылча байрамлагъа халкъны асламысы бек тынгылы хазырланады. Ол кюнлеге аш-азыкъ, суула, чагъырла сатыу бютюн къаты барады. Жарсыугъа, аллай кезиуледе аманлыкъчыла да тириледиле.

Роспотребнадзорну Къабарты-Малкъарда бёлюмюнде айтханларына кёре, чагъыр сатып алырдан алгъа,  талай жорукъгъа эс буругъуз. Россей Федерацияны законодательствосуна тийишлиликде аракъыны эмда аллай башха продукцияны (этил спирти 13 процентден артыкъ болгъан) жол жанларында, оптовый неда розница рыноклада, маршрут транспорт тохтаучу жерледе орналгъан тюкенледе алыргъа жарамагъанын билигиз. Аланы къолдан-къолгъа неда  Интернет бла сатыугъа да чек салынады. Алагъа алданнган кеси саулугъуна, бирде уа жашаууна да къоркъуу салады.

Быллай продукцияны сатыу бла кюрешген организацияланы тийишли лицензиялары болургъа керекди. Ол документ тюкенде адамла кёрюр жерде тагъылады.

Россейде чыгъарылгъан аракъыны неда чагъырны шешасында энчи марка болургъа керекди, тыш къыралладан келтирилгенде уа – акциз марка. Экилерини да этикеткаларында орусча быллай затла жазылыргъа керекдиле: продукцияны аты, ёлчеми, стандарты, неллай бир спирти, бал тузу эмда (бар эсе) ГМО болгъаны, къурамы, хайырланыргъа жараулу болжалы, къайда эмда къачан чыкъгъаны, багъасы, предприятияны адреси эм башха.

Продукцияны качествосуна бир тюрлю соруугъуз чыкъса неда аны сатыуда бузукълукъ эслесегиз - Роспотребнадзоргъа сёлешигиз. Дагъыда эсде тутугъуз, быллай затланы артыгъы бла хайырланыу саулукъгъа бек осалды!