Битеу бёлюмледе да - ёсюм

Былтыр онбир айны ичинде Къабарты-Малкъарда эл мюлк организацияланы бар тюрлюлери, сора энчи предпринимательле эмда иели мюлкле 64,9 миллиард сом багъасы  продукция  чыгъаргъандыла. Республиканы Эл мюлк министерствосунда айтханларына кёре, буруннгу жыл бла тенглешдиргенде,  ёсюм 4,3 процент болгъанды. Дагъыда Шимал-Кавказстатны тергеулерине кёре, регионда малланы, юй къанатлыланы саны, малчылыкъ продукция да кёбейгендиле.

Алыучулагъа иги кесек мирзеу эмда чёплеу жиберилгенди

Республиканы эл мюлк организациялары былтыр онбир айны ичинде алыучулагъа 176,3 минг тонна мирзеу эмда къудору сатхандыла, дейдиле Шимал-Кавказстатда. Аны бла ол кёрюмдю, буруннгу жыл бла тенглешдиргенде, кёп къалмай ючден бирине (31,8 %) кёбейгенди. Ол санда нартюхден эки кереге кёп (90 минг тоннадан артыкъ) сатылгъанды. Предприятияла дагъыда чёплеуден да 37 процентге аслам жиберип, аны 6,7 минг тоннагъа жетдиргендиле. Сёз ючюн, буруннгу жылда ол 4,9 минг тонна эди.

Къырал программаны къыйматы иги болгъанды

«Эллени комплекс халда айнытыу» къырал программаны чеклеринде (аны Эл мюлк министерство бардырады) Тырныауузда суу бла жалчытхан тёрт объект бла бир сабий садик жангыртылгъандыла эмда олимпиада резервни спорт школуна бла сабий чыгъармачылыкъны айнытыу арасына ремонт этиле турады, дегендиле КъМР-ни Эл мюлк министерствосунда. Дагъыда Элбрус элде Маданият юй бла спорткомплекс ишленнгендиле, Шалушкада аллай комплексни бла футбол ойнаучу майданны къурулушлары бошалгъанды, Псыхурей элде уа Маданият юй хазыр болургъа кёп къалмагъанды. Аны юсюне, бу программаны хайырындан дагъыда Псыхурей бла Кахун элледе битеу да 6,8 километр узунлугъу болгъан эки жол жангыртылгъанды.