Билим бериуде тынгылы жангыртыу жумушла боллукъдула

«Единая Россия»  РФ-ни Жарыкъландырыу министерствосуна 2025-2027 жыллада билим бериу сферада  тынгылы жангыртылыргъа керекли мекямланы тизмесин кёргюзтгенди. Анга тёрт мингден аслам школ, сабий сад бла техникум киргендиле.

«Единая Россияны» генсоветини башчысы Владимир Якушев къурулуш жумушла къалай толтурулгъанларына партия къарап турлугъун айтханды билим бериуде объектлени тынгылы жангыртыугъа жораланнган кенгешде. Анга жарыкъландырыу министр Сергей Кравцов да къатышханды.

Владимир Якушев Россейни Президентини Посланиясында белгиленнген программа кенгертилип, анга сабий садла бла орта профессионал билим берген учрежденияла кийирилгенлерин белгилегенди. Партия уа регионлада болумну тинтип, тийишли башламчылыкъла этгенди.

- Федерал тизмеге 3210 школ, орта профессионал билим берген учрежденияланы 276 мекямы бла  837 сабий сад кийирилгендиле. Бу кезиуде  68  школ бла 63 сабий сад ишлетирге белгиленеди. Хар объектге жууаплы депутат бла сенатор салыннганды,- дегенди  Владимир Якушев.

Програмима ишлеген кезиуде уа – 2022 жылдан бери – 4,5 минг школ тынгылы жангыртылгъанды, аладан 406-сы - 2024 жылда.   Москва эм  Рязань областьлада,   Адыгея, Ингушетия, Калмыкия, Татарстан эм Чечен Республикалада борчла барысы да толтурулгъандыла.

Жангы школланы ишлетиу программаны чеклеринде уа 1411 школ ишлетилгенди. алада 850 минг окъуу жер къуралгъанды. 2019 жылдан  2024 жылда ноябрьге дери кезиуде 1682 сабий сад хайырланыргъа берилгенди, алада 246 балагъа окъуу жерле бардыла энди. 

 Школланы тынгылы жангыртыу программаны «Единая Россия» Жарыкъландырыу министерство бла бирге бардыргъанын эсгертирге тийишлиди. Ол партияны халкъ программасына киреди. Аны жарашдырыуну юсюнден башламчылыкъны РФ-ни Президенти Владимир Путин 2021 жылда партияны съездинде этген эди. Мекямланы проектлеринден башлап, аланы хайырланыргъа бериуге бери битеу ишлеге регионлада жамауат штабла къарагъанлай, тинтгенлей турадыла.

«Билим бериу» миллет проект жашауда бардырылгъан кезиуде партияны болушлугъу бла Президентни 1300 школну ишлетиу жаны бла буйрукълары толтурулгъандыла.

КъМР-ни Башчысы, партияны регион бёлюмюню секретары Казбек Коков айтханыча, республикада он школда къурулуш ишле андан ары бардырыладыла. Ала битдирилселе, 6 минг сабийге окъуу жерле къураллыкъдыла. Алай бла алада окъутуу бир сменнге кёчюрюллюкдю.

- Школла, билим бериуде жорукълагъа тийишлиликде,  жангы мебель, тийишли оборудование бла жалчытылынадыла. Хар биринде коммунал-техника системала бардыла, жол-транспорт инфраструктура къуралгъанды. Алада сабийлени окъутууну, айнытыуну шёндюгю амаллары кийирилгендиле. Сёзге, Вольный аулда 12-чи номерли школну жангы мекямы ишлетиледи, анда 800 сабийге жер боллукъду. Окъутуу мекям бла бирге стадион, баскетбол эм волейбол ойнарча майданла, солуу жерле да къураладыла. Анга Нальчикни 14-чю номерли лицейини жангы мекямы, 23-чю номерли школ да къошуладыла. Экисинде да бирге 1,5 минг сабийге окъуу жерле боллукъдула. Нарткъаланы юг-запад жанында да жангы школ ишлетиледи. Анда оюн жерле, футбол майдан да боллукъдула. Энтта бир школ Чегемде «Южный» микрорайонда орналгъанды. Анда уа 820 окъуу жер къураллыкъды,-дегенди Казбек Валерьевич.

KABARDIN-BALKAR.ER.RU сайтда айтылгъаныча, 2022 жылдан бери   школланы тынгылы жангыртыу эм ишлетиу программаны эмда партияны халкъ программасыны болушлугъу  бла регионда 60 мекям тапландырылгъанды, 2024 жылда уа – 13. КъМР-ни Жарыкъландырыу эм илму министерствосу тинтиуле бардырып, тынгылы жангыртыу программагъа 17 сабий садны сайлагъанды. Аладан 2-си келир жылда, 6-сы 2026 жылда, къалгъанлары уа 2027 жылда тапландырыллыкъдыла.

Тикаланы Фатима хазырлагъанды.
Поделиться: