ТУУГЪАН ЖЕРЛЕРИН КЪОРУУЛАГЪАН ЖИГИТЛЕ

Аллы 15 январьда чыкъгъанды.

3-чю даражалысына уа - Абайланы Магомет бла Кърым, Гелястанланы Кёккёз Келеметланы Исмайыл, Сотталаны Зулкъарний, Улбашланы Келлет, кичи урядник Шакъманланы Алий-Солтан, Эфендиланы Аслан-Алий.

2-чи даражалы Георгий жоргъа Улбашланы Келлет, Шакъманланы Алий-Солтан, Эфендиланы Аслан-Алий ие болгъандыла.

«Жигитлик ючюн» деген 4-чю даражалы Георгий майдалланы Абайланы Кючюк, Айдаболланы Хажомар, Аналаны Хажимырза, Атабийланы Къаракиши, Байсолтанланы Аубекир, Башийланы Солтан, Бийланы Ибрагим, Гелястанланы Кёккёз, Гергъокъланы Суфиян, Жаболаны Минчакъ, Жеттеланы Абдуллах, Къазийланы Атабий, Къарабашланы Оразай, Къочхарланы Къара, Локияланы Зулкъарний, Мисакаланы Кёккёз, Османланы Кючюк, Созайланы Аубекир бла Мудар, Сотталаны Зулкъарний, Таучуланы Баймырза, Улбашланы Келлет бла Магомет-Гирей, Холаланы Ахмат, Чапаланы Магомет, кичи урядник Шакъманланы Алий-Солтан, Шауаланы Азнор, Чеченланы Мусса алгъандыла.

3-чю даражалы майдалланы – Шаханланы Асланбек, Мисакаланы Кёккёз, 2-чи даражалыны уа Мисакаланы Кёккёз алгъанды.

1915 жылда майда Келеметланы Исмайыл бла Абайланы Магомет милицияны прапорщиклерине айырылгъандыла. Аланы св. Аннаны «Жигитлик ючюн» 4-чю даражалы, св. Станиславны 3-чю даражалы орденлери бла да саугъалагъандыла.

Келеметланы Исмайыл, жарсыугъа, ол сермешледен биринде жоюлгъанды. Башхаланы уруш баргъан жерде асырасала да, аны ёлюгюн 3-чю даражалы Георгий жору, «Жигитлиги ючюн» св. Аннаны 4-чю даражалы ордени бла Осетияда Хазнидоннга анасы Фердауусха тапдыргъандыла. Аппайланы Макар да ауушханды анда, ауур жараларындан болалмай.

1915 жылда майда Эфендиланы Къазий, Бачиланы Абдулла, Саракайланы Алий, Мисирланы Бузир а Видинево элни къатында урушлада тас болгъандыла. Гузиланы Хажимусса бла Шакъманланы Алийсолтан жаралы болгъандыла.

Абайланы Магомет а, башында  айтылгъандан сора да св. Аннаны 3-чю, 2-чи даражалы, св. Станиславны 2-чи даражалы, св. Владимирни 4-чю даражалы орденлери бла саугъаланнганды.

Георгий майдаллагъа Гупполаны Чортай, Атабийланы Танаш, Мисакаланы Кёккёз ие болгъандыла.

Орусбийланы Чепелеу Св. Аннаны «Жигитлик ючюн» 4-чю ы, 3-чю даражалы, св. Станиславны 2-чю эм 3-чю даражалы орденлери бла саугъаланнганды. Жаболаны Ахия уа св. Станиславны 3-чю даражалы орденин алгъанды. Келеметланы Исмайыл да Св. Аннаны «Жигитлик ючюн» 4-чю даражалы ордени бла саугъаланнганды.

Бийланы Ибрагимге прапорщик чын берилгенди.

Эфендиланы Аслан-Алий, Жаппуланы Дугу, Созайланы Аубекир, Абайланы Кърым милицияны юнкерлерине, Абайланы Магомет поручикге кёргюзтюлгендиле. Кичи урядник Асанланы Хажимуратны уа Саугъалаучу думаны членине эмда полкну комитетине айыргъандыла. Шакъманланы Жамбот бла Мисакаланы Кёккёз Румынияны ордени бла саугъаланнгандыла.

Полкда Низам сюдню къурамына подпоручик Орусбийланы Чепелеу бла тамата урядник Эфендиланы Аслан-Алий айырылгъандыла. Аслан-Алийге милицияны юнкери деген чын берилгенди. 1917 жылда 27 июльда ол душман бла сермешде жоюлгъанды. Анда этген жигитлиги ючюн ол Георгий жорну 1-чи даражалы орденине тийишли болгъанды. Алай бла ол Георгий жорланы тёртюсюн да алгъанды.

Поручик Абайланы Магомет, урядник Асанланы Хажимурат, Керменланы Малкъарукъ, Мокъаланы Карай, Татчаланы Адилгерий, Таучуланы Биймырза, Гупполаны Чортай милиция жаны бла окъургъа айырылгъанланы санына киргендиле.

Ма алай махтаулу болгъандыла таулу жашла озгъан ёмюрню аллында окъуна, Ата журтларын къорууларгъа чакъыргъанларында.

Мусукаланы Сакинат хазырлагъанды.
Поделиться: