Жангы амалланы хайырлана айныргъа чакъыргъандыРоссейни басмасыны кюнюнде редакцияда къонакъда КъМР-ни цифралы айнытыу, связь эм асламлы коммуникацияла министри Аскер Бозиев болгъанды. Ол журналистлени профессионал байрамлары бла алгъышлап, мындан ары газетни айнытыуда къаллай амалланы хайырланса иги боллугъуну юсюнден ушакъ бардыргъанды. Министр бла коллективни «Заманны» баш редактору Къонакъланы Хасан танышдыргъанды. Газетни харкюнлюк иши къалай къуралып бардырылгъаныны юсюнден билдириу этип, Хасан Азретович сёзню къонакъгъа бергенди. Аскер Русланович туура этилген информациягъа тынгылагъандан сора республикалы басма органла къагъыт газетледен сора да электронный номерлени да айнытыугъа, окъуучугъа ала бютюн сейир болурча амалланы излерге эм аланы жашауда бардырыугъа энчи эс бёлюрге чакъыргъанды. - Регион, бютюнда тилледе чыкъгъан газетледе, мен федеральный жангылыкъланы басмалауну тюзге санамайма. Аланы башха ресурслада табаргъа да болады. Бизни респбуликада жашагъанланы уа кесибизде бола тургъан ишле бла, адамла бла шагъырей этерге керекбиз. Барыбыз да билгенден, бюгюнлюкде жашауубузгъа цифралы ресурсла бла социальный сетьле теренден терен сингип барадыла. Биз да газетлени ВК эм Телеграмм сетьледе энчи бетлерин бардырыргъа керекбиз. Бардыргъанда да адамла алагъа сюйюп къарарча этерге, - деп чертгенди ол. Ушакъны кезиуюнде газетибизни баш редакторуну орунбасары Жангорзланы Нажабат «Заманны» хар номери да 95 процентге кесини журналистлерини материалларындан толтурурлгъанын билдиргенде, министр ыразы болуп, ол ыздан таймай ишлерге чакъыргъанды. Дагъыда Аскер Бозиев регион газетлерибизни сатхан жерле болмагъанларын да тюзге санамагъанын билдиргенди эм аны бла байламлы тюрлениуле боллукъларын билдиргенди. - Биз кеси адамларыбызгъа деп ишлей эсек, аланы газетлени сатып алыр амаллары да болургъа керекди деп оюм этеме. Аны себепли, бу вопросха да энчи эс бёлюуню тюзге санайма. Газетлени жаздырып алмагъанланы да аланы сатып алыр онглары болургъа керекди. Гражданларыбызгъа ахшы, магъаналы жангылыкъланы жетдириу бизни баш борчубузду, - дегенди министр. Дагъыда магъаналы атламладан бирине ол журналистлени къолайлыкъларын ёсдюрюуню бла жалчытыуну санагъанын билдиргенди. Асламлы информация органланы КъМР-ни Маданият министерствосундан КъМР-ни Цифралы айнытыу, связь эм асламлы коммуникацияла министерствосуна ётдюргенли алай кёп болмайды. Аны себепли, министр билдиргеннге кёре, тюрлениуле белгиленипдиле. Къалай алай болсада, газетлени къагъыт версиялары уа сакъланырыкъдыла. - Хар он жылдан газет окъуучуланы тёлюлери тюрлене баргъаны хакъды. Аланы асламы информацияны не халда кёрюрге сюйгени да аны бла бирге тюрленирикди. Аны себепли ол затланы эсге ала аоай ишлерге керекбиз, - деп белгилегенди тюбешиуню ахырында Аскер Русланович.
Поделиться:
Читать также:
12.02.2025 - 16:04 →
Къойчулукъну айнытыуну юсюнден сёлешиннгенди
12.02.2025 - 15:56 →
Бизде къыз къачырыуну энчиликлери
12.02.2025 - 12:53 →
Узун жашауну бир къауум амаллары
11.02.2025 - 09:00 →
Эс бурдурурча – къоркъуулу сурат
11.02.2025 - 08:49 →
Кечеледен биринде къыйын ауруула тюшюрюледиле
|