Жангы жылны аякъ машиналада учуу бла башлай

Къар Аппала да къыйын ишлерин толтургъандан сора солургъа сюедиле, Жангы жылны белгилегенлей, ала аякъ машиналада учаргъа атланнгандыла.   

Алай бла Келишиулюкню майданында велосипед спортну сюйгенле жылларын зауукълу башлар умут бла жыйылгъандыла. Алагъа жолоучулукъну уа шахарны айнытыу «Платформа» майдан къурагъанды, ол бу башламчылыгъын талай жылны тёрели халда бардырады, Къар Аппаланы кийимлерин кийиу а анга энчи къууат береди. Жыйылгъанланы иги кесеги бери тенглери, юйюрлери бла келгендиле, ала Келишиулюкню майданындан Абхазия майданнга  дери жолну велосипедчилеге деп белгиленнген кесегинде баргъандыла. Институтну башчысы Оксана Шухостанова айтханнга кёре, аякъ машиналада аслам адамны жыйып барыуну мураты Нальчик спортну бу тюрлюсюн айнытыугъа аламат келишгенин кёргюзтюудю. «Шахарыбызда велосипедледе учаргъа сюйгенлеге битеу онгла бардыла, жоллада жерле бериледиле, хауа да келишеди. Биринчи январьны да бошдан сайламагъанбыз, бюгюн бери эм тириле жыйылгъандыла», - дегенди ол.