Озгъан жылны кёрюмдюлерин сюзгендиле

КъМР-ни Башчысы Казбек Коков КъМР-ни жер эм ырысхы бла байламлы халланы министри Аслан Тохов бла тюбешгенди. Ала Жер эм ырысхы бла байламлы халланы министерствосуну озгъан жылда къалай ишлегенлерини юсюнден эм быйылгъы жылда тамамланыллыкъ соруулагъа къарагъандыла.

Аслан Тохов  Къабарты-Малкъарны къырал иелигинде эм министерствону бойсунууунда болгъан ырысхыны къыйматлы хайырланырча  къаллай  амалла этгенлерини эмда республикалы бюджетге не тюшгенини юсюнден айтханды. 2024 жылны кёрюмдюлерине кёре, битеу салыннган борчла белгиленнген мардадан эсе асламгъа толтурулгъандыла.

Озгъан жылда бюджетге 136,9 миллион тюшгенди, ол белгиленнген мардадан 32,2 миллион сомгъа асламды. Башхача айтханда, план 130,7 процентге толгъанды эм ёсюм 126 процент болгъанды. Андан сора да, Къабарты-Малкъарны иелигинде болгъан къарал ырысхыны сатып, бюджетге 52,4 миллион сом тюшгенди.

Дагъыда акцияларыны бир бёлеги къырал иеликде болуп тургъанлай, къыйын болумлагъа тюшген биригиулеге эм аланы мюлклерин тозураудан сакъларгъа эм аланы ишлерин ахырда тохтатмаз ючюн талай иш тамамланнганды. Андан сора да,  къырал эм муниципал иеликде болгъан ырысхыны тохташдырылгъан мардалагъа кийирир муратда Россейни федерал антимонопольный службасындан алгъан къагъытха кёре, министерство къырал эм муниципал предприятияланы иеликлерин тюрлендириу ишни бардырады.

Тюбешиуню кезиуюнде акционер биригиулени бюгюнлюкде финанс  болумлары эм инвестиция проектлени  бардырыуну чеклеринде  жеринден тепдирилмеген ырысхыны эм жер участкаланы хайырланырча амалланы да сюзгендиле. Аны юсюнден КъМР-ни Башчысыны бла Правительствосуну пресс-службасы билдиргенди.