Жерлешибиз айырмалыланы санында

Кёп болмай Къабарты-Малкъардан  суратчы  Байсыланы Ахмат RussianTraveler журнал бардыргъан  "Россейни хазнасы" деген битеуроссей конкурсда хорлагъанды. 

Ахматны "Дебетни туудугъу" деген  иши «Адет  эм къол усталыкъ"   номинацияда биринчи жерге тийишли болгъанды. Суратда  белгили сауут-саба  ишлеген уста Бачиланы Хамзат тюшгенди.  Аны магъанасы  къараучуну   айтхылыкъ къарачай-малкъар  темирчи Дебет жашагъан  заманнны   нарт эпосуну кезиую бла шагъырей этергеди. 

  - Темирчи эрттегили усталадан бириди эм бюгюнлюкде да сейир этдирир ючюн къоймайды.  Бачиланы Хамзат бёкем санлы кишиди, аны быйыл жайда гюрбежисинде ишини юсюнде тюшюргенме.  Суратха алыу бла эрттеден  бери хобби халда кюрешеме, болсада бу жол  конкурсда хорлагъаным манга бек асыу кёрюннгенди,- дейди Байсы улу.

Ахмат келир заманнга муратын да ачыкълагъанды. "Жарсыугъа, заман бла тас бола баргъан усталыкъла бардыла. Сёз ючюн, таулула ёмюрледен бери   малла  бла кечине келедиле. Ол себепден  мени муратым Огъары Малкъарда сабийлигимде   жашауну ачыкъларгъады. Аны чеклеринде  тау бетледе  миллет кийимледе чалгъычыланы, дырынчыланы суратха алыргъа сюеме",- дейди суратчы.

Эсге сала айтсакъ, Байсы улу Къабарты-Малкъарны «Свой стиль» фотоклубуну келечисиди, кёп  конкурслада бла сурат проектледе биринчи жерге тийишли болгъанды. Сурат алыу бла  гитчелигинден бери кюрешеди, болсада профессиоанла халда уа   2011 жылда башлагъанды. 

"Россейни хазнасы" битеуроссей конкурс  быйыл бла ючюнчю кере бардырылады.  Мында авторла сегиз  номинацияда эришедиле.  Бу жол Москвадан Андрей Гусаровну  «Россейни жоллары» энчи номинацияда  Шимал-Кавказ тематикагъа аталгъан «Домбайгъа жол» иши да биринчи  жерге тийишли болгъанды.