Жангы мардалагъа келиширикди

Нальчикде 1-чи номерли клиника больницасыны жеринде сменагъа 500 адамгъа къарарча поликлиниканы къурулушу барады.   Аны уллулугъу 10 минг квадрат метрге жетеди.  Алгъадан белгиленнгенича, республикада эм уллу поликлиниканы къурулушуна 700 миллиондан аслам сом къоратыллыкъды.

Бусагъатда аны участогуна 80 минг адамгъа жууукъ киреди. Эски учреждение борчун 1961 жылдан бери толтургъанды. Анга алгъадан сюелген мекямланы бири берилген эди. Бюгюнлюкде уа саусузланы санына танг къошулгъаны ючюн тийишлисича къараргъа онг болмагъанды.

Жангы поликлиника толусунлай «аяулу технологияланы» жорукъларына келиширикди, картохранилищеси бла регистратура, терапевт бёлюм, терк болушлукъ тапдыргъан служба, медицина специалистлени отоулары, медицина профилактиканы бёлюмлери, медик студентлеге окъутуу классла бла аудиторияла, процедура эм прививка отоула, смотровойла, кюндюзгю стационар, административ-мюлк бёлюмле къураллыкъдыла. Медицина махкемени кючлю лаборатория-диагностика мурдору, эндоскопияны эм медицина реабилитацияны шёндюгю бёлюмлери, амбулатор онкология болушлукъну арасы да боллукъдула. Аны бла бирге госпитализация изленмеген хирургия эм эндоскопия операцияла да этилликдиле.

Поликлиника  хайырланыргъа берилирча кёп къалмагъанды. Бусагъатда аны арбазын айбатландырып, ичинде этиллик  жумушланы да тамамлап кюрешедиле. Ол санда бийик технологиялы оборудование бла жалчытырча  мадар да  этилликди.

Саулай алып айтханда, учреждение Шимал-Кавказ федерал округда  эм уллу амбулатор-диагностика араладан бири боллукъду. Аны бла байламлы регионда поликлиника  службаны айныууна иги  кесек къошумчулукъ этерикди.