Усталыгъынгы жюрегинг бла сайласанг

27 декабрь – Къутхарыучуну кюнюдю

Мен акъыл этгенден, адам улу усталыкъны кесини халине бла кёз къарамына кёре сайлайды. Аны себепли къутхарыучу болургъа хар инсан да таукел болалмайды. Ол бек къыйын усталыкъладан бириди. Хар кюн сайын адамлагъа болушлукъгъа келип, жашауларын сакъларгъа табылып тургъан жашларыбыз, сёзсюз, не уллу да махтаугъа тийишлидилие. Биз да бюгюн сизни аладан бири Моллаланы Эдуард бла шагъырей этерге сюебиз. Ол Элбрус бийик тау излеу-къутхарыу отрядны «Уллу-Тау» бёлюмюне таматалыкъ этеди.

Молла улу Тырныауузда туууп ёсгенди. Сабийлигинден юйюрюнде сингдирилген насийхат сёзле бла излемле жашны бу усталыкъгъа келтиргендиле. 2008 жылда ол къутхарыучу болады. 16 жылны ичинде анга 200-ден артыкъ къутхарыу ишге къатышыргъа тюшгенди. Кюн сайын таулада ишлей келген жаш бюгюнлюкде 1-чи класслы къутхарыучуду. Кёп тюрлю къутхарыу ишледе кесин кёргюзте келген жашны эсинде уа 2021 жылны сентябрь айында болгъан жарсыулу къутхарыула къалгъандыла.

- Ол кюн 5 минг метрден бийикликде 19 адам хауа болумла тюрленнгенлери бла байламлы табийгъатны тузагъына тюшген эдиле. Аладан биринчи болушлукъ тилеу билдириу келгенде бир къауумубуз мычымай жолгъа тебиреген эди. Алай альпинистле бир жерде угъай, башха-башха жерледе болгъанларыны юсюнден жашладан белги келгенде, дагъыда жангы къауумубуз жолгъа чыкъгъан эди. Биз бир ненча къауумгъа юлешинип, жаныбызгъа къоркъууда ишлеген эдик ол кече. Буз ыранлагъа кетерге къоркъуу бар эди. Желни кючю 40-70 метрге жете, температура уа 20 градусха жете кете эди. Къар къатыш боранны хатасындан аллынгы бир метрден ары кёралмай эдинг. Альпинистле белгиленнген маршрутдан бир жанына кетгенлери себепли, хар бирин энчи излерге тюшгенди. Къутхарыучула келгинчи ала 15-20 сагъатны тургъандыла къарлы боранны ичинде. Кёплери биз келгенде не бола тургъанын ангылагъан окъуна этмей эдиле. Халлери бек жарсыулу эди. Жашла аланы кеслеринде кётюрюп тюшюргендиле десем, ётюрюк болмаз. Алай бла ол 14-сюн табып, медиклеге берген эдик. Аладан 11-не госпитализация керек болгъанды. Жарсыугъа, бешеулен ёлген эдиле, - деп эсгереди Молла улу.

Борчун бийик даражада толтургъаны ючюн Моллаланы Эдуард «За спасение погибавших» деген къырал саугъагъа эм «КъМР-ни сыйлы къутхарыучусу» деген атха тийишли болуп, саугъаланнганды.

Дагъыда бюгюннгю жигитибиз юлгюлю атады. Юйдегиси бла 3 сабий ёсдюреди. Ишден бош заманында уа уучулукъ эм чабакъчылыкъ бла кюреширге сюеди.