Халкъны бир ниетлилигини белгиси бла

2024 жыл политика жаны бла да бай болгъанды. Биринчиден, Россейни Президентин айыргъаныбызны сагъыныргъа тийишлиди. Къол кётюрюу юч кюнню – 15-17 мартда - баргъанды. Къабарты-Малкъарда Россей Федерацияны Президентин айырыула къуралыулу ётгендиле.
КъМР-ни Айырыу комиссиясы билдиргенича,   республикада къол кётюрюрге келгенлени саны 92,57 процентни тутхан эди. Аладан Владимир Путин жанлы болуп айырыучуланы 94,2 проценти къол кётюргендиле.

Айырыуладан сора КъМР-ни Башчысы Казбек Коков республиканы жамауатына ыразылыкъ сёзюн айтханды: «Бу ишни инсанлыкъ борчларына санап, аны толтурур ючюн айырыу участкалагъа келгенлени барысына да жюрек ыразылыгъымы билдиреме. Къабарты-Малкъарны халкъы инсанлыкъ эмда патриот ниетин, жууаплылыгъын, политика эслилигин, къырал ючюн къайгъыргъанын, билимлилигин да кёргюзтгенди»,- деген эди.

Къол кётюрюуден сора бардырылгъан социология тинтиуле уа къыралда жамауатны 65 проценти къол кётюрюуню эсеплерини тюзлюгюне ишексиз болгъанларын, айырыучуланы сайлауларына келишгенин айтхандыла.  Дагъыда 18 проценти уа бир-бир жерледе кемчиликле, бузукълукъла болгъан эселе да, ала айырыулагъа артыкъ уллу басыулукъ этмегенин билдиргендиле. 

Тинтиулеге къатышханланы 42 проценти Россейни Президентин айырыуну эсеплерине ышаныулукъ бла къарагъанларын, 34 проценти ыразы болгъанларын, 21 проценти ёхтемленнгенлерин айтхандыла. Къол кётюрюуге артыкъ къууанмагъанларын а жамауатны жаланда 7 проценти белгилегенди. Ма быллай ышаныулукъда сайлагъан эдик къыралыбызны оноучусун. 

Сентябрьде уа – къол кётюрюуню бирикдирилген кюнюнде – биз КъМР-де Парламентни 7-чи  чакъырылыууну депутатларын айыргъанбыз. 

Битеу да бирге къол кётюрюуге 400 961 адам къатышханды, ол а айырыучуланы 73,7 процентиди. Эллерибизге бла шахарларыбызгъа бу политика магъаналы иш къалай баргъанын газетде тынгылы билдиргенбиз.  

Алай бла законла чыгъарыучу органнга 70 адам сайланнганды. Единая Россия» Партияны келечилерине 50 мандат жетгенди. 

Коммунист партия 9 мандат алгъанды. «Справедливая Россия» партиягъа 7 мандат жетгенди. ЛДПР бла «Жашилле» партиялагъа 2 мандат берилгенди.

Спикерни къуллугъуна парламентарийле Татьяна Егорованы, орунбасарлагъа уа Жанатайланы Салимни бла Мурат Кардановну тийишли кёргендиле.

Бу кюнледе уа  Парламентни 7-чи чакъырыуу биринчи сессияны  жетишимли бошагъанды. Ол санда депутатла 2025 жылны эмда 2026-2027 план кезиуню бюджетин эки окъулууда къабыл кёргендиле. 

Кюз арты сессиясыны ахыргъы жыйылыуунда уа спикер Татьяна Егорова  къысха кезиуню ичинде кёп магъаналы жумушла толтурулгъанларын чертгенди. «Бу заманда  биз 55 праволу актны къабыл кёргенбиз, ол санда 24 республикалы законну да. Аланы арасында бюджет энчи жерни алады»,-дегенди ол.

3 октябрьде КъМР-ни Парламентини депутатлары республиканы Башчысын сайлагъандыла. Казбек Коков айырыула аллы программасында Къабарты-Малкъарны  2030 жылгъа эмда 2036 кезиуге дери айнытыуну мадарларын кёргюзтген эди.   

– 2030 жылгъа дери регионну кесинде чыгъарылгъан продукцияны 700 миллиард сомгъа жетдирирге мурат барды. Аны къалай толтурлугъубузну, къаллай мадарла  кереклисин да билебиз. Алай бла уа кеси файдаланы 45 миллиарддан 48 миллиардха дери жетдирирге къолдан келликди,-деген эди ол кюн Казбек Валерьевич.

Депутатла, регионну оноучусуна кандидатланы программаларына, Казбек Коков бла бирге уа бу къуллукъгъа РФ-ни Президенти Владимир Путин Шауаланы Илиясны бла Алексей Войтовну кёргюзтген эди, тынгылагъандан сора, жашырын халда сайлауларын этип, барысы да бирча Казбек Коков жанлы къол кётюргендиле. 

Къабарты-Малкъарны Башчысыны къуллугъуна киришгенине аталгъан жыйылыуда, Казбек Коков Конституциягъа  къол салып, республиканы халкъына къуллукъ этерге ант бергенди.  

– Къабарты-Малкъарны Башчысыны къуллугъун толтургъанда, адамны эм инсанны эркинликлерине бла праволарына хурмет этерге, Россей Федерацияны, Къабарты-Малкъарны Конституцияларын толтурургъа эм къорууларгъа, республиканы къыраллыгъын, аны жерини битеулюгюн, къоркъуусузлугъун сакъларгъа, Къабарты-Малкъарны халкъына къуллукъ этерге ант береме, – деген эди ол. 

Болсада политика магъаналы жумушла 2025 жылда да боллукъдула. Бек алгъа уа Россейни Къырал Думасыны депутатларын сайларыгъыбызны эсгертирге сюебиз. Хар замандача, республиканы жамауаты политика оюмлулугъун, инсанлыкъ тирилигин кёргюзтюп, бу жумушлада да алчы боллугъуна ишексизбиз.