«БЫЛАЙДАМЫСА?!»

Бир-бирде адамла бири бирине алай сакъ боладыла, сейир окъуна этесе. Ма сюелебиз хар бирибиз кеси кезиуюбюзню сакълап тюкенде Жангы жылны аллында. Бек сюеме алай сюелирге. Андача манга бир киши сакъ болмайды, андача киши сормайды, излемейди мени. Дагъыда, алай сюелсенг, не къадар жангы хапар билесе.

Мени аллымда бу жол менден аз тамата эр киши сюеледи. Ары-бери барады, заманны ашыра. Узакъгъа къарап кёп турады да, сора, артха айланып:

– Билемисе, – дейди манга, – быллай жерлеге жюрюрге, бютюнда былай сюелирге бир да ыразы тюйюлме, амалым болмай келеме ансы. Юйде хар не къалай эсе да бирча тауусулуп къалады да, ма былай сюелмез ючюн, бирде чайны тузланнган чабакъ бла ичерге тюшеди, бирде сыраны кампет бла кепдирирге кюрешеме. Бюгюн а башхады – не десенг да, Жангы жыл атлайды босагъадан. Анга къалай тюбесенг, жылынг алай озарыкъды дейдиле да, хар не да элпек болсун деп…

– Сора дагъыда ауругъан этебиз деп тарыгъасыз, – дейди аллыбызда сюелген тиширыу, аны сёзюн бёлюп. – Ашны айырып ашаргъа керекди. Бютюнда сизни жыл саныгъызда.

– Сиз а дохтурмусуз? Жыл санымы да нек санаргъа къалгъансыз? Сора Жангы жылда да кесими къууандырыргъа бир эркинлигим болмаймы къалды? Андан сора бу мени болсун деп байрам къалмагъанды сора, – дейди да жанымда сюелген, ангылайма аны жарсыуларын.

– Бусагъатдагъы дохтурланы къатларында мен профессорма, ахшы киши! Не ауруугъа да Интернетде дарман барды. Жангы жыл а – ол жаланда санауду. Алдатмагъыз кесигизни!

– Сора айтчыгъыз, къан тамырны басыуун энишге этер ючюн не этерге керекди? – деп къошулады алда тургъанладан бир къарт. – Жангы жылны кечесинде хар бир салют атылгъаны сайын, ол ёрге кете барады. Бюгече да алай боллукъду.

– Кесигизни аман затха хазырламагъыз. Аны дарманы кёпдю, – дейди «профессор». – Сизни жыл саныгъызда, салютлагъа тынгылап турмай, башха затха эс бёлюрге керексиз. Сёз ючюн, чабакъны тюкенде сатып алмай, кесигиз тутаргъа боллукъсуз. Ол иш жюрекни тынчайтады.

– Сора кёлде ётдюрмю дейсе байрамны?! Кёргенме чабакъ тутуп да, – дейди къарт, къол булгъай. – Анда да тапмайса жюрек ырахатлыкъ: бузну тюйюп тешесе, бусагъат бирле кёредиле да, штраф саладыла деп, къоркъуп, къалтырап тураса.

– Сууукъданмы, къоркъгъанданмы?

– Аны уа не билейим…

– Былайдамыса?! – деп, очередьде къоншусун тас этмегенине къууанады ушагъыулу тиширыу. Сора ахтынып: – Жангы жыл жетип келеди, алай ол мени къууандырлыкъгъа ушамайды, – дейди.

– Нек айтаса алай?

– Къыркъ жылында туугъан кюнюн этерге жарамайды дейдиле. Аны сагъышын этеме.

– Къыркъ жылмы? Да, аны ючюн нек къайгъы этесе? Къачан эсе да кетген заманны артхамы къайтарлыкъса? – деп тынчайтыргъа кюрешеди танышы.

– Къайда айланаса? Кезиуюбюз жете турады, – деп къууаннганмы этеди огъесе шартлыкънымы белгилейди орта жыл санлы тиширыу. Сора, тёгерекге жангыдан кёз жетдирип: – Билген адамла айтханнга кёре, халкъ иги жашап башлагъанды, – дейди.

– Адамла уа алай айтмайдыла.

– Да ала не биледиле? Кёрмеймисе бу Жангы жыл деп сюелгенлени? Была барысы да ахчаларын къайры жояргъа билмей турадыла…

Эки жаш тиширыу, арлакъгъа да кетмей, жууукъ да турмай, анда болгъанларын билдирип сюеледиле.

– Салкъын, мен санга алай сукъланама. Былтыр насыбынг тутхан эди.

– Ах кюнюм! Мени уа сен сукъланырча нем барды?

– Болмай а! Бу жангы эринг къаллай ариу къылыкълы адамды, ол бирсингча болмай. Художник. Ол алгъыннгынг ким болуучу эди?

– Къобузчу.

– Хау, эсиме тюшдю, къуруда ол къобузун кынна-кынна этдире айланыучу эди. Былтыр Жангы жылда арбазда той этген эди да! Хы, ма бу жангынг, дейме, ариуду, чачы да бурма, узун. Баулу къолан хуржуну бла. Кесин да бир керечик окъуна гюлсюз кёрмегенме, ийнан. Аны айтырыкъ эдим. Баям, Жангы жылда да бир иги саугъа этерик болур санга. Не сакълайса?

– Да не билейим, Фатимат, къобузчу кюн сайын жыр айтып алдаучу эди. Бу уа иш хакъын гюллеге жояды да, юйге хайыры тиймейди…

Эшитдими-къалдымы ушакъ нёгери кёлкъалдыгъа тартханын, билмейме, алай а айтханы бу болду ол Фатимат дегенни:

– Насып деген алайды: бир затынгы кем этсе да, башха затынгы уа элпек этип къояды. Бири, сёз ючюн, къобузчу, насыплы болгъанын жыр бла айта эсе, художник а гюл бла билдиреди! Бир да болмай эсе да, сыфаты барды ол биринчинги къатында! Аты да! Ху-дож-ник! Жангы жылда мен Аллахдан кесиме бир художник тилерикме, къоншуларым сукълана-сукълана турурча…

Ма алай дуниядан хапар аласа, кезиуюнгю сакълап сюелсенг Жангы жылны аллында тюкенде.