Аскерчилени бла сакъат сабийлени бирикдирген байрам

Нальчикде «Пара-Арчери  «Хорламгъа бирге» деген уллу спорт-адаптив башламчылыкъ ахырына жетдирилгенди. Аны мураты сакъат сабийлеге жамауат жашаугъа къошулургъа болушууду.

Башламчылыкъ талай кесекден къуралгъанды. Сабийле инклюзив спорт бла кюрешгендиле, къауум-къауум болуп эришгендиле. Аны энчилиги уа – бу ишге энчи аскер операцияны ветеранлары да къатышханлары болгъанды, аланы саулукъларына заран тюшюп, мындан ары жашауларын спорт бла байламлы этерге сюйгендиле, алгъаракълада ала талай эришиуде жетишимли да болгъандыла. Сабийле бла аскерчилени араларында уа шуёхлукъ да тохташханды. Проектни жарашдыргъан, спорт-адаптив школну башчысы Александр Кулюшин белгилегеннге кёре, аскерчиле сакъат сабийлеге жигитлегеча къарайдыла, гитчелеге уа жигитле къазауатдан къайтханладыла. Ала бир бирни ангылайдыла, бир бирлерине болушургъа кюрешедиле, алай эсе уа, проект анга салыннган муратлагъа жетгенди, дегенди ол.

Спортчула садакъдан атдырыуда, женгил атлетикада сынашадыла, бочча ойнайдыла – спортну бу тюрлюлери барысы да Пара-Арчериге киредиле. Хар сюйгеннге да спортну жаратхан тюрлюсюнде къарыуун кёрюрге эркинлик берилгенди. Голболну уа, иги кёрмегенлени спорту, юлгюге, Нальчикни футболдан школуну бла Парламентни къауумлары ойнагъандыла.

Эришиулени жабылыулары да эсде къалырча ётгенди. Сабийлеге махтау сёзлерин Парламентни депутатлары, белгили спортчула бла тренерле айтхандыла. «Александр Кулюшиннге, мында ишлеген тренерлеге бла юйретиучюлеге жюрекден ыспас этеме. Алагъа огъурлулукълары, былай ауругъан сабийлеге къайгъыргъанлары ючюн ыразылыгъымы билдирирге сюеме»,- дегенди футболдан къыралны тиширыу къауумуну баш тренери Юрий Красножан. 

Эришиуледе спорт-адаптив школну быйыл ишини эсеплери да чыгъарылгъандыла, ала уа аз тюйюлдюле. Юлгюге, Таукенланы Алим Россейни пауэрлифтингден чемпионатында штанганы кётюрюуде кюмюш майдалны къытып, къыралны паралимпиада жыйымдыкъ къауумуна киргенди, алда умутлары уа бютюн уллудула. Садакъдан атдырыуда бла женгил атлетикада уа, Россейни биринчилигинде талай майдал къытып, Дара Кауфова къууандыргъанды. Ол спортсуз жашаялмазлыгъын, жарау этген нёгерлери, тренерлери бла бир юйюрча тургъанларын да билдиргенди. Эм иги тренерлеге саугъала бла сыйлы къагъытла берилгендиле. 

Эришиуню ётдюрюуге къошумчулукъну Нальчикни футболдан школу этгенди, Пара-Арчери проект Президент грантланы фондуну себеплиги бла бардырылгъанды.