Жангы приборла бла жалчытылыннганды

Май районну ара больницасына «Саулукъ сакълау» миллет проектге кирген «Саулукъ сакълауну биринчи болушлукъ берген бёлюмюн жангыртыу»  федерал программагъа кёре  жангы цифралы приборла берилгендиле.

Алай бла поликлиника  «Диамант» цифралы маммограф, «Versana Premier – УЗИ эм  Диаком-Рей рентгенограф  аппаратла къоллу болгъанды. Ала  къысха заманда   тюз диагноз салыргъа болушурукъдула.

Бюгюнлюкде сагъынылгъан   оборудование бла районну ючден бирине, неда  7 294 чакълы адамгъа,  къаралгъанды.  Бютюнда  тиширыулада  онкология аурууланы тинтирча аслам  эс бурулады. Аны бла байламлы  маммографны   1 345 тиширыу,  неда элли процент чакълысы,   ётгенди. Ал  кезиуде быллай  процедураны этдирирча  Нальчикге барыргъа тюшгенди. 

Цифралы оборудование бийик качестволу суратла чыгъарады. Аны себепли аурууну башлана тургъан кезиуюнде окъуна тинтирге тынч болады. Сёз ючюн,  168 тиширыуда онкологияны башлана тургъанында эм 14-де уа  кюч ала тебиреген заманларында билиннгенди.

Сагъынылгъан приборла бла ишлерге тынчды, ол анда  интерфейслери да тап келишеди. Аны хайыры бла кеслерине къаратырча эм диагнозларын билирча   саусузлагъа кёп сакъларгъа тюшерик тюйюлдю. Алада ишлерик  персонал да  тийишли курсланы ётюп, билимлерин ёсдюргендиле.  

Жууукъ заманда поликлиникалада эски  рентген аппаратланы жангы комплексге  алышыр мурат этиледи. Аны бла бирге профилактика халда тиширыуланы 70-80 процентине къараргъа акъыл барды. Ол шарт къыйын аурууланы заманында тинтирге эм жашауларын созаргъа болушурукъду. 

Районда жашагъанланы  иги кесеги саулукъларына къаратырча,  врачла алларына келгенлеге  диагностиканы жангы онгларын айтмай къоймайдыла, аны бла бирге социал  сетьледе да дайым билдириуле этиледиле.