Жаш тёлю бла жетишимли ишлерча

Къабарты-Малкъар къырал университетде жаш тёлю бла жетишимли ишлеяллыкъ устазланы хазырлар муратда «Тёлюлени ауазы» деген жангы билим бериу программа бардырылгъанды.

Юйретиу программаны Россейни Илму эмда бийик билим бериу министерствосу Росмолодёжь бла бирге эки жыл мындан алгъа жарашдыргъанды. Аны борчу устазланы жаш тёлю политиканы бардырыугъа къошумчулукъ этерге, тёрели тин-ниет хазнабызгъа таяна бусагъатдагъы заманны энчиликлерине келишген амалланы хайырланыргъа юйретиудю. Башхача айтханда, устазла, анга кёре, студентлени окъутханларындан тышында, аланы дуниягъа кёз къарамларын тохташдырыргъа да болушурукъдула.

Программаны ачылыуунда жыйылгъанланы университетни биринчи проректору Мурат Гукепшоков алгъышлагъанды. Россейде бла тыш къыраллада университет юйретиуню тенглешдире, ол вузну ишинде тёлюлени ниет жаны бла юйретиу уллу магъананы тутханын белгилегенди. «Юйретиу тыш къыраллада да барды, алай ала адамланы акъылларын бир тюрлю ниетге бойсундургъанчадыла. Бизге ол жол келишмейди», - дегенди.

Программаны бардыргъан Виталий Адрианов а башламчылыкъны чегинде университетде жаш адамланы юйретиуге, жаш тёлю политиканы тамамлаугъа къошумчулукъ этерге сюйген устазла биригирикдиле, алагъа окъутууну бла юйретиуню кёп тюрлю амалларыны юсюнден айтыллыкъды. Ала бла тюбешиуледе абадан жашаугъа къаллай инсанны жиберирге тийишлисини юсюнден соруу кётюрюллюкдю. «Заман жетгенде, барыбыз да къартайырыкъбыз, ызыбыздан къаллай адамланы къойгъаныбыз а бюгюн этген мадарларыбызгъа кёре боллукъду. Борчубуз ата-бабаларыбыздан къалгъан тин-ниет байлыкъны тас этмегенлей, аны бютюн байыкъландырып, ёсе келген тёлюлеге сакълауду эм ётдюрюудю», - деп чертгенди ол.

 Юйретиуню кезиуюнде тестле боллукъдула, ушакъла бардырыллыкъдыла, лекцияла окъуллукъдула. Алай бла устазла юйретиуню жангы амалларына тюшюнюрюкдюле.