Окъуугъа, ишге да кёл салады

Быйыл медицина жаны бла билим берген окъуу юйлени къызыл дипломла бла бошагъан къызларыбыз бла жашларыбыз асламдыла. Ала регионубузда саулукъ сакълауну бёлюмлерин айнытыугъа юлюшлерин къошарларына, жамауатны ышаныулугъун кючлерлерине да ийнанабыз. Медицинаны эм къыйын эмда сейир ызларын сайлап, бирси жерледе сынам жыйышдырсала да, билимлерин а мында хайырланыргъа сюйгенлери хурметге тийишлиди.

Мисирланы Лейла да быйыл Санкт-Петербургда къырал педиатрия медицина университетни «Гастроэнтерология» усталыгъында ординатурасын жаланда бешлеге бошагъанланы санындады. Алгъадан белгилесек, таулу къыз къыралны эм белгили окъуу юйлеринден биринде, ординатор болгъанындан сора да, Вальдман атлы факультетли терапия кафедраны илму жаны бла ишине тири къатышханлай тургъанды. Башха-башха темалагъа конференцияланы къураргъа болушханды.

Андан сора да, Мисирланы къызларыны бир ненча ординатор бла бирге сагъынылгъан кафедраны доценти Сергей Витальевич Ивановну башчылыгъында уллу илму ишни жазаргъа къатышханын белгилерчады. Ол ишни тамамлар ючюн а, ала эм алгъа уллу жумушну бардыргъандыла – юч жюз чакълы саусузну саулугъу къалай тюрленнгенин эмда алагъа къалай багъаргъа тийишлисин тинтгендиле. Ол кеси да Кронну аурууу бла байламлы жумуш болгъанды эмда пациентлеге эндоскопия, гистология, клиника жаны бла да къаралгъанды.

Быллай уллу жумушну бардыргъан къауумну келечилери уа аны грантха да кёргюзтгендиле. Айхай да, алыннган тема эмда тамамланылгъан иш адам улуну саулугъу бла байламлы къыйматлы болгъаны ючюн грантны къытхан да этгендиле. Алай бла анга деп бёлюннген ырысхыгъа энди язвалы колитни эмда Кронну аурууун аланы ал кезиулеринде ачыкълауну математикалы юлгюсюн жарашдырыу ишле бардырыллыкъдыла. Лейла да, белгилегенибизча, ол жумушха къатышырыкъланы санындады.

Аны школ жылларына къайтсакъ, ол анда да иги окъугъанды. Не усталыкъ бла къадарын байларыгъыны юсюнден кеси алыкъа сагъыш этмеген кезиуюнде окъуна анасы Анахаланы Шамкъыз къызчыкъны врач болургъа хунери барлыгъын эрттеден окъуна ангылагъан, кёрген да этген эди. Жарсыугъа, Шамкъыз дуниясын эртте алышып, Лейланы бюгюнлюкде медицина жаны бла жетишимлерин кёралмагъан эсе да, къыз а этген затын анасыны осуятын толтуруу бла байламлы этгеннге санайды.

- Анам мени врачха окъуруму бек сюйгенди. Тёзюмлю, иш кёллю болгъаным да бу усталыкъгъа келиширигин айтханлай тургъанды. Баям, алай бла ол кесини алгъадан да муратын толтурургъа излегенди. Аны атасы ахшы фельдшер болуп, анабыз аныча врач болургъа кеси да сюйген эди. Алай а аны къадары башха жол бла элтгенди. Болсада, медицинагъа сюймеклигин къоймай, дарман хансланы, багъыу амалланы юслеринден кёп окъугъанлай тургъанды, анга кёре уа билими, ангылауу да иги болгъанды. Адамла болушлукъ излеп да кёп келгендиле анама. Бюгюнлюкде ол къатымда жокъ эсе да, аны врач боллукъса деп, манга ышанып туруучусу къарыу бергенча болама, - деп, хапар айтханды кеси уа ушагъыбызны кезиуюнде.

Усталыкъны юсюнден Лейла онунчу классда сагъыш эте башлагъан эди. Медицина жанына окъуугъа кирир ючюн, биология, химия дерследен ЕГЭ-ле берирге кереклиси белгилиди. Былайда уа бир шарт бютюнда сейирди. Алгъадан айтсакъ, Мисирланы къызлары химиядан Бир къырал сынауда жюз баллгъа тийишли болгъан эди. Ол жыллада уа аллай жетишим саулай республикагъа да уллу даража болгъанды.

Алай эсе да, Лейла кеси айтханнга кёре, эм алгъа ол бу дерсни иги ангылаялмай, къыйналгъан да этгенди. Аны ючюн а, кесини медицинагъа барлыгъына толу ийнаннгандан сора, репетиторгъа жюрюп башлайды. Бу жаны бла тюшюндюрген Лариса Петровна Борисовагъа аны усталыкъ, окъуулулукъ даражасы ючюн хурметин, ыразылыгъын да айтады.

Алай бла ЕГЭ-лени барысындан да ахшы балла алып, къагъытларын Москвада, Нальчикде, Краснодарда да береди. Аланы барысында да медицина факультетни бюджет бёлюмлерине киргенин билгенден сора уа, сайлауун ёз республикабызда тохтатады.

КъМКъУ-да билим ала, мында окъугъанына аз да сокъуранмагъанды. Студент кезиуюнде да илму бла кюрешип, сабий ауруула, аначылыкъ эмда гинекология кафедраны профессору Ёзденланы Зухура Хаджимуратовна бла бирге ковидни сабий сакълагъан тиширыуланы бла къагъанакъланы саулукъларына не бла къоркъуулу болгъаны бла байламлы тема бла ишлегенди. Андан сора да, антисептикалы амалланы къыйматлыларын тинтгенди эмда адамны анатомиясындан олимпиадалагъа къатышханды. Окъуугъа, ишге да кёл салгъаныны себеби бла уа университетни къызыл дипломгъа бошагъанды.

Ызы бла уа, белгилегенибизча, билимин ёсдюрюрге сюйюп, Санкт-Петербургда ординатурагъа киргенди. Алай эсе да, ол анда жаланда окъугъаны бла къалмай, ишлеген да этеди. Ал кезиуден окъуна ординатурада билим алгъан университетини мурдорундагъы госпитальны кардиология бёлюмюне медсестра болуп киргенди. Анда ишлегени да Лейлагъа усталыкъ жаны бла сынам алыргъа себеплик этгенди.

Бютюнда кардиология бла ол юйренирге баргъан гастроэнтерология бёлюм экиси да бир мекямда болгъанлары окъуууна заран салмагъанды. Алай бла ол ауруулары къыйын саусузлагъа врач даражада кеси къараргъа, багъаргъа юйренип, сынам жыйышдыргъанды. Аны ючюн а гастроэнтерология бёлюмню башчысы Рустам Ниязовха ыспас этип, аны насийхатчылыкъ жаны бла къыйматлы ишлегенин да айтады.

Огъарыда сагъыннганыбызча, энди Лейла гастроэнтеролог дипломун да алып, юйдегилерин, устазларын да къууандыргъанды. Быйыл а ол энди Санкт-Петербургда, УЗИ-диагностиканы эте билирге юйрене, билимин андан ары ёсдюреди. Окъууун бошап, усталыгъына толусунлай юйреннгенден сора уа, кесини билимин туугъан жеринде хайырланыр муратдады.