Предпринимательлени саны ёсгенди, кеслерине да онг бериледи

Къабарты-Малкъарда гитче эмда орта предпринимательство субъектлени саны бу айны аллына 22,4 мингнге жетгенди. Аладан 16,6 минги энчи предпринимательледиле, къалгъанлары уа предприятияла бла организацияладыла. Былтырны ол кезиую бла тенглешдиргенде,  ёсюм 6,9 процент болгъанды, деп билдиргендиле «Мени бизнесим» арадан.

Дагъыда кеслери иш къурап къармашханланы саны 81 минг чакълы болады. Аладан 78,5 минги инсанладыла, 2,5 минги уа энчи предпринимательледиле. Бу къауумда уа ёсюм 15,5 процентге жетгенди.

Алай бла, республикада уруннган адам санына къарагъанда, аладан тёртден бири гитче эмда орта предпринимательствода ишлегенлерин кёребиз. Аланы барындан да республиканы бюджетине быйыл ал 10 айны ичинде налогла бла 2,3 миллиард сом тюшгенди. Сёз ючюн, былтырны ол кезиуюнде тёлеуле 1,8 миллиард сом эдиле.

Саулай Россейде гитче эмда орта бизнесге 2021 жылдан башлап, 890 миллиард сом багъасына поручительствола берилгендиле. Аны хайырындан ала 90 мингден артыкъ кредит алгъандыла. Ансыз а хар ючюнчюсю аны алаллыкъ тюйюл эди. «Ахчаны ючден бири продукция чыгъарыу эмда жумушла бериу бла кюрешген гитче эмда орта предпринимательлеге берилгенди», - дегенди МСП Корпорацияны башчысы Александр Исаевич.

Алай бла жарашдырыучу производствола 205 миллиарддан аслам сом багъасына себеплик кёргендиле, илму-техника компанияланы уа 33 миллиард сомгъа онгдургъандыла. Дагъыда IT-компаниялагъа - 32, къонакъ юйлеге бла жамауатха аш этиу бла кюрешген предприятиялагъа 22 миллиард сом багъасына билеклик этилгенди. Ала ахчаны инвестиция жумушлагъа жиберирге, бизнеслерин айнытыргъа, башха тюрлю борчларын тамамларгъа боллукъдула.

Къабарты-Малкъарда уа бу амал бла 2,1 миллиард сом (196 кредит) берилгенди. Аны хайырын 165 гитче эмда орта предпринимательство субъект кёргенди.

Гитче эмда орта предпринимательство бла кюрешгенле, Къабарты-Малкъарны Гарантияла берген организациясыны болушлугъу (гарантиясы) бла быйыл бу айны аллына дери 802 миллион сом къоллу болгъандыла. Быллай онг кредит алыргъа залог мюлкю жетмегенлеге бериледи. Аны хайырланыргъа сюйгенле «Мени бизнесим» арагъа барсынла неда сёлешсинле: Нальчик, Киров атлы орам 224, 8-800-222-51-07.

Улбашланы Мурат хазырлагъанды.
Поделиться: