Тынгылылыгъы бла татымлылыгъы бла да кенг белгилиди

Къабарты-Малкъарда жашил къудорудан этилген  консерва Россейни качествосуну белгиси  бла белгиленнгенди,- деп  билдириледи КъМР-ни Эл мюлк министерствосуну пресс-службасындан.

Роскачествода айтханларыча,  сагъынылгъан продукция бла байламлы  быллай даража бюгюнлюкде  жаланда эки регион тийишли болгъандыла.

Республикада  жашил къудорудан консерваны этип алты предприятие кюрешедиле,  кёбюсю уа   «Зелёная компания» биригиуге жетеди. Аны продукциясы   «6 соток»  бренд бла чыгъады.            

Тынгылылыгъы бла татымлылыгъы ючюн  ол  бирси регионлада да кенг белгилиди. Аны баш сылтауларын бири иги сырьё хайырланнганыны эм алыучула жаратырча энчи амал бла   жарашдырылгъаныды. 

Эсге сала айтсакъ, "Качествону белгиси" кёп тюрлю тинтиуледен сора танг кесек  мардалагъа (Гостха) келишген продукциягъа бериледи.  Анга тийишли болгъан   биригу автомат халда "Россейде этилгенди" деген  белгиге да тийишли болады. Аны бла продукцияны юсюнде "чыпчыкъ" халда  къыралны байрагъы да салынады.

Андан сора да, Made in Russia каталогда биригиуню эм продукцияны юсюнден да  билдириледи. 

Битимчиликде бла малчылыкъда ёсюм эсленеди

Быйыл Къабарты-Малкъарны эл мюлк производительери 59,5 миллиард сом багъасы  продукция чыгъаргъандыла.  Ол былтыр бу заман бла тенглешдиргенде, 104 процентге кёпдю. 

Жылны эсеплей айтханда,  жерчилик бла байламлы  тёрели продукцияны чыгъарыуда иги ёсюм эсленеди. Аны бла бирге битимчиликден тышында, малчылыкъ бёлюм да тири айный барады, анга кёре продукциягъа да къошулады.

Сагъынылгъан кезиуде мюлклени барында да союлмагъан ауурлукъда   97,1 минг тонна эт сатылгъанды, 458,7 минг тонна  сют сауулгъанды эм 190,7 миллион чакълы жумуртха алыннганды. Анга кёре, былтыр бла тенглешдиргенде, юч къауумда да 7,3, 2,1 эм 4,5 процент ёсюм эсленеди.

Жылны  башындан бери   тууарланы бла ууакъ малланы саны да иги кесекге  кёбейгени белгиленеди.

Бизни корр.
Поделиться: