Нальчикде сабий чыгъармачылыкъны «Кюнлю шахар» академиясында жетинчи классланы окъуучуларын лицейге алгъанлары бла байламлы байрам болгъанды.

Къууанчлы ишге окъуучула, аланы ата-аналары да къатышхандыла, абадан класслагъа жюрюгенле уа гитче къонакъларын бютюн ашыгъып сакълагъандыла – жетинчи класслагъа сертификатланы ала бергендиле. Ала уа лицейге киргенлери уллу къыйын салыуну эсеби болгъанын чертгендиле.

Сабийле лицейде окъуу аланы муратлары болгъанын, аны ючюн ала дерслени къадалып окъугъанларын, аны хайырындан сынауланы жетишимли ётгенлерин де айтхандыла. Ала бери киргенлери уллу къууанч, аны бла бирге уа уллу жууаплылыкъ да болгъанын ангылагъанларын да белгилегендиле.

Академияны башчысыны къуллугъун толтургъан Джаппуланы Тамара уа сабийле ата-аналарыны, устазларыны ышаныуларын алдатмазларына ышаннганын билдиргенди.  «Хар биригиз да жашауугъузда огъурлу ишлеригиз бла айырмалы болуругъузгъа жюрекден ийнанама. Инсанны къадарында биринчи жерде адеплиликми, билимми тургъанларын айтхан къыйынды, эм иги ала бир ызда барсалады», - дегенди ол. Окъуучулагъа алгъышлау сёзлерин сыйлы къонакъла да айтхандыла.

«Эльбрус» корпоратив университетни башчысы Тамара Айбазова да лицейчилени айырмалы студентле боллукъларына, къыралыбызны эм иги вузларына кирирликлерине ышаннганын билдиргенди. «Къыралыбыз ёсе келген тёлюлеге билим алыргъа быллай онгланы къурагъанды. Тамблагъы кюнде  сизге таяныргъа боллугъун а, сиз Ата журтубузгъа, туугъан жеригизге жарарыгъызгъа ийнаннганды», - деп къошханды.

Эм жууаплы жумуш а алгъышлау сёзледен сора болгъанды – окъуучула лицейге киргенлери бла байламлы ант этгендиле.

 Ахырында уа видео амал бла аланы лицейни башха-башха жыллада бошагъанла алгъышлагъандыла, бюгюнлюкде ала Москваны, Санкт-Петербургну, башха уллу шахарларыбызны вузларында окъуйдула. Ала эсгертгенлерича, аланы бусагъатда болдургъан жетишимлерини мурдору мында алгъан билимлериди. Студентле бусагъатдагъы лицейчилеге аланы тамблагъы кюнлери къаллай боллугъу аланы кеслерини къолларында болгъанын эсгертип жетишимле тежегендиле.