Жомакъны къонакълары

Нальчикни окъуучулары алгъаракъда «Орус жомакъда» къонакъда болгъандыла. Сахна оюн онтёртюнчю гимназияда кёргюзтюлгенди.

Бир оюнда жомакълы дунияла бир бирлери бла тюбешедиле. Башха жомакъладача, мында да игилик бла зорлукъ, кертичилик бла хыйлалыкъ, тюзлюк бла терслик къажау сюеледиле. Ариу жасалгъан сахна, миллет кийимле кийген артистле, жыр-тепсеуле сабийлени эслерин бийлейдиле.

Сахна оюнну борчу ‒ сабийлени тёгерекде ариулукъну кёре билирге, аланы сейирсиндириуню юсю бла орус халкъ чыгъармачылыкъны ангыларгъа эм багъаларгъа юйретиудю. Ол мурат бла сейир, кюлкюлю болумла да суратланадыла.

Къабарты-Малкъарны сыйлы артисти, режиссёр-постановщик Евгения Толстова айтханыча, гитче къараучулагъа, ала орус халкъ жомакъланы къалай билгенлерин сынарча, сейир викторинала да къуралгъандыла. Жомакъланы эм белгили жигитлери, халкъ чыгъармачылыкъны сейир дуниясы – ала барысы да жарыкъ тюрсюнлю болургъа тийишлидиле, сабийни кёзю илинмесе, ол тынгыламайды, дейди.

Оюнну уа уллу чыгъармачылыкъ къауум, «Арабеск» юлгюлю ансамбль, сахнаны жасаучула, кийимле тикгенле эм башхала хазырлагъандыла. Аны салыргъа уа грант алгъанлары болушханды. Алгъа жыллада «Тауларыбызны жомакълары» оюнла республиканы он районунда кёргюзтюлгенди. Аны къараучула жаратхандыла, аны бла кёлленип, энди тёрели орус жомакъланы хазырлагъандыла.

«Культура.ру» жамауат биригиуню башчысы Зита Кабулова сабийлени эслерин шёндюгюлю жомакъладан миллет таурухлагъа кёчюрюрге, аланы ариулукълуран кёргюзтюрге сюйгенлерин белгилегенди. «Къыралыбызда, республикабызда кёп миллетле жашайдыла, муратыбыз ‒ аланы маданиятларыны ариулукъларын суратларгъады», - дегенди ол.

Башламчылыкъны чегинде шахарны мектеплеринде беш сахна оюн кёргюзтюллюкдю.

Темуккуланы Амина.
Поделиться: