Чам жаны бла усталыкъларын кёргюзтгендиле

Нальчикде къырал концерт залда КВН-ни юниор къауумларыны араларында оюну бардырылгъанды. Анга республиканы шахарларындан бла районларындан онеки-онжетижыллыкъ окъуучула къатышхандыла.

Аланы республиканы жаш тёлюню ишлери жаны бла министрни орунбасары Ахметланы Артур алгъышлагъанды. «Жылны студенти» миллет саугъаны регион кезиуюнде хорлагъанлагъа дипломларын берип: «Быллай фахмулу адамланы кёрген хычыуунду, жаш тёлюбюз тириди, хунерлиди, гитчеликден да сабийле айныргъа кюрешедиле, биз а кесибизни жаныбыздан алагъа къачан да болушлукъ этерге хазырбыз», - дегенди.

Оюнла клубну жорукъларына кёре бардырылгъандыла, къауумла саламлашыуда, разминкада, музыка эм башха бёлюмледе сынашхандыла. Чамлары уа школ жашауну, устазла эм ата-аналары бла араларыны, сайларыкъ ишлерини юсюнден болгъандыла.