Алгъышла, жырла, тепсеуле да

Нальчикни 33-чю номерли мектебини мурдорунда Къабарты-Малкъарда сабийлеге къошакъ билим бериуге быйыл 90 жыл толгъаны бла байламлы къууанчлы жыйылыу болгъанды. Аны хурметли къонакълары  КъМР-ни Правительствосуну  председателини биринчи орунбасарыны  къуллугъун толтургъан  Сергей Говоров, Парламентини Билим бериу, илму, физкультура, спорт эмда жаш тёлюню ишлери жаны бла комитетини председатели Нина Емузова, жарыкъландырыу эмда илму министри Анзор Езаов,  халкъгъа билим бериуде эмда илмуда ишлегенлени регионда профсоюз бёлюмюню башчысы Сергей Карныш, Сабийлени бла жаш тёлюню «Биринчилени къымылдаулары» Битеуроссей жамауат-къырал биригиулерини республикада бёлюмюню таматасы Аслан Шипшев, бирси министерстволаны бла ведомстволаны келечилери, къошакъ билимни айныууна юлюшлерин къошхан  ветеранла да болгъандыла.

Байрамны ача,  КъМР-ни жарыкъландырыу эмда илму министрини орунбасары Екатерина Мисостова устазланы алгъышлагъанды. Республикада къошакъ билим бериу жылдан-жылгъа айный баргъанын чертгенди. Быйыл «КъМР-да къошакъ билим бериуге – 90 жыл» деген белги бла озгъанын эсгерте, ол заманны ичинде мастер-классла, ачыкъ дерсле, тюрлю-тюрлю методика магъаналы кёрмючле аслам халда къуралгъанларын айтханды. Ол билдиргеннге кёре, энди бюгюнлюкде регионда беш жыллары толгъанладан башлап, онсегиз жыллары болгъанлагъа дери жашланы бла къызланы къошакъ билим бла жалчытыу сексен процентге жете келеди.

Екатерина Николаевна къошакъ билимни ветеранларына эмда бюгюнлюкде бу бёлюмде тохташдырылгъан ахшы тёрелени андан ары бардыра, айныта, жангы амалланы да кийире ишлегенлеге ыразылыгъын билдиргенди эмда мындан арысында бийик жетишимле, саулукъ тилегенди. Хар замандача, Сергей Александрович байрамгъа къуру къол бла келмегенди. Ол, ветеранланы жюрекден алгъышлай, къошакъ билим бериу бизни саулай да къыралыбызда юлгюлю болгъанын, андан бирсиле да юйренирге сюйгенлерин айтханды. «Сайлагъан ишигизге кертичилей къалгъаныгъыз, республиканы билим бериуюню бу бёлюмюне уллу эмда къыйматлы сынам жыйышдыргъаныгъыз ючюн сау болугъуз»,-деп, аланы саугъалагъан да этгенди.

Алгъышлагъа Сергей Анатольевич да къошулгъанды. Ол «устаз» деген ангылам жаланда усталыкъны аты болуп къалмай, адамны жюрегини излеми, сайлагъан ишине сюймеклиги болгъанын чертгенди.  Педагогну сабийге сюймеклиги уа аны жетишимли болуруна да талпындыргъанына ийнаннганын  айтханды. Арт кезиуде къошакъ билим бериу бёлюмде республикада аз къалып сабийлеге 50 минг чакълы жангы жер ачылгъанын, айхай да, аллай тарих а аны тутхучлу, юлгюлю да бола баргъанын ачыкълагъан ышанладан бири болгъанын да.

Ызы бла уа устазланы бир къауумун КъМР-ни Правительствосуну  сыйлы грамоталары бла саугъалагъанды. Белгиленнгенлени  арасында Гуданаланы Юрислан (Элбрус район) да болгъанды.
Нина Гузеровна да, жыйылыугъа сюйюп келгенин, ол, кертиси бла да, республика даражалы байрам болгъанын ангылата, алгъышын алай этгенди. Къыралда эм алгъа анда-мында кружокла, Пионерлени юйлери болгъан замандан бери кёп тёлюле къошакъ билим ала ёсгенлерини, андан бери уа бу бёлюм алгъа иги да атлам этгенини юсюнден хапарлагъанды.

Бу жыйылыугъа да республикабызда билим бериуню ол кесегини тарыхын андан ары бардырыргъа билимлерин, иш кёллюлюклерин, заманларын да аямагъанла, алгъа таукел къарагъанла, жаш тёлюню билимли-окъуулу болуруна, аланы хунерлерин айнытыргъа талпыннганла келгенлерин да айтханды. Къошакъ билимни жюзжыллыкъ юбилейине да республика ахшы, юлгюлю даражада жетерине ийнаннганын билдире, залдагъылагъа ол байрамгъа да сау-саламат, жетишимле бла тюбериклерин тежеп, КъМР-ни Парламентини ыспас къагъытлары бла бир ненча устазны белгилегенди. Аланы санында уа Аппайланы Аминат (Черек район),  Ахматланы Елена (Прохладный) да бардыла.

Анзор Клишбиевич а, байрам бла алгъышлай, бюгюнлюкде билим бериуде бола тургъан тюрлениуле, аны излемлери да сабийлеге къошакъ халда билим берирге кереклисин да толу ачыкълагъанларын ангылатханды. «Сизни иш кёллю болгъаныгъызны,  аланы тамблагъы кюнлерини  юсюнден сагъыш этгенигизни хайыры  бла ала жашауда кеслерини жолларын да табадыла»,-дегенди.

Министр бюгюнлюкде республикада къошакъ билим бериу жаны бла аслам иш этилгенин,  проектлени да бирини ызындан башхасы жашауда бардырыла, аланы хайырлары бла амалла кенгере баргъанларын билдиргенди. Ызы бла «Жюрегими сабийлеге береме!» деген Битеуроссей даражалы усталыкъ эришиуню регионда бардырылгъан урумуну башха-башха бёлюмлеринде айырмалы болгъанланы белгилегенди. Алай бла бу конкурсда жетишимли болгъанлары ючюн Биттирланы Светлана (Чегем район) бла Байзуллаланы Зарема (Элбрус район) да КъМР-ни Жарыкъландырыу эмда илму министерствосуну сыйлы грамоталары бла саугъаланнгандыла. Къошакъ билимге къыйматлы юлюш къошханы ючюн быллай даражалы грамота Багъатырланы Муратха, Кучмезланы Фатиматха, башхалагъа да берилгендиле.

Къууанчлы жыйылыуну кезиуюнде алгъыш сёзлерин эшитдиргенле аслам болгъандыла. Музыка театрны солисти Жаболаны Замираны, «Кабардинка» къырал академиялы тепсеу ансамбльни,  КъМР-ни халкъ артисти Ольга Сокурованы,  «Кюн шахар» сабий чыгъармачылыкъ академияны жыр хоруну, «Арабеск» юлгюлю тепсеу ансамбльни, кёп башхаланы хунерлери уа аны керти да  байрамгъа бургъан эдиле.