«Тириликлери, усталыкълары ючюн да баш урабыз»

Ахшы адамланы, ишлеринде усталаны юслеринден  жазарыбызны тилеп, редакциягъа окъуучуларыбыздан письмола келедиле, телефон бла сёлешгенле да боладыла. Бу жол а Бызынгыда жашагъанланы атларындан элде почта бёлюмню таматасы Чочайланы Лейля жазгъанды бизге. 

«Заман» газетибизни багъалы ишчилери! Биз, Черек районну Бызынгы элинде  жашагъанла, газетни бек сюйюп алабыз. Аны бетлеринде ахшы адамларыбызны юслеринден окъусакъ, ёхтемленебиз. Бютюнда бег  а айырмалы медиклени юслеринден сюйюп окъуйбуз. Аласыз бизни жашауубуз къалай боллукъ болур эди, деп да сагъыш этебиз. 

Бизни элибизни амбулаториясында ишлегенле да жаланда махтаугъа тийишлидиле. Район больницаны  врачлары, медсестралары, фельдшерле, терк болушлукъ берген бёлюмню бригадасы, санитарла да боюнларына алгъан жумушну  айыпсыз толтурадыла десем, киши угъай дерик болмаз. Ала барысы да  Гиппократны антына кертичилей къаладыла. Кеслерин да бир ниет бирикдиреди – саусузгъа болушур ючюн къолдан келгенни аямазгъа. 

Анга бу шарт да шагъатлыкъ этеди. Алгъаракълада  бир юйюрден экеулен тузланнган жууала ашайдыла, бир кесекден а кёллери аман этип, дыгаласха къаладыла. Олсагъат  фельдшер Аналаны Тасимни жашы Асланнга сёлешип, болумну  билдиредиле. Ол, терк окъуна жетип, тиширыулагъа биринчи болушлукъну этеди, сора район больницадан   бригаданы чакъырады. Андан а Кючмезланы Аминат бла Атабийланы Сакинат келедиле. Ма аланы тириликлерини, усталыкъларыны, керекли мадар эте билгенлерини хайырындан эки тиширыуну да жашаулары сакъланнганды. 

Медицинаны сайлагъан адамланы ишлери женгил  болмагъанын барыбыз да билебиз. Аны ючюн аланы аллында баш ура, жюрек ыразылыгъыбызны билдире, узакъ ёмюр, кийик саулукъ да тежейбиз. Кёп жылланы бет жарыкълы ишлерча насып, кюч-къарыу да берсин алагъа Уллу Аллах!»,- деп жазгъанды Лейля.