Тынгылылыкълары бла айырмалыла

Кёп болмай  Москвада,  тыш къыралланы келечилери да къатышып, «Медицина эм качество-2024» деген XVII битеуроссей илму-практика конференция болгъанды. Аны кезиуюнде Къабарты-Малкъарны медицина организацияларына «Ишлерин тынгылы бардыргъанлары ючюн»  шагъатлыкъ къагъытла берилгендиле. 

Эки жылны ичинде Росздравнадзорну качество жаны бла миллет институтуну шагъатлыкъ къагъытларына республиканы 19 медицина учреждениясы тийишли болгъандыла. Ол  бизнича  гитче регионнга уллу жетишим болгъанын да энчи белгилерчады.  

Алай бла бюгюнлюкде Къабарты-Малкъар Юг эм Шимал-Кавказ федерал округлада биринчи болалгъанды эм саулай къыралда окъуна  беш алчы регионну тизмесине киргенди. 

Бу жол "шагъатлыкъ" къагъытла бла Нальчикни 2-чи, 3-чю номерли поликлиникалары, 1-чи номерли стоматология ара, республиканы клиника больницасы, кёп профильли сабий клиника ара, физкультура диспансер, стоматология ара, Нарткъала бла Майскийни стоматология поликлиникалары эм «Звёздочка» сабий санаторий саугъаланнгандыла.