Окъуучуланы сейирлерин къозгъагъан дерсле

Ана тилибизни сакълаугъа уллу эс бурургъа кереклиси хакъды. Ол жумушну эм алгъа юйюрле, ызы бла уа школлада ана тилден бла адабиятдан дерсле жалчытадыла. Окъуучу устазны дерслерине сюйюп келирча, ол дерсле бары бирге ушамай, сейир эм магъаналы къуралсала, хайырлы боладыла.

Тырныауузну Отарланы Керим атлы 1-чи номерли лицейни башланнган классларында ана тилден бла адабиятдан устазы Джаппуланы Жулдуз Ахматовна дерслерин сейир къурар ючюн, кёп амалланы хайырланады. Тилден эришиуле, оюнла жарашдырады. Окъулгъан чыгъармалагъа кёре ачыкъ дерсле бардырады.

Сабийлени ана тиллеринде жырларгъа, назмуланы ариу окъургъа да юйретеди. Андан сора да, кеси кенг хайырланнган амалладан бири – библиотека дерслени бардырыуду. Устазны оюмуна кёре, сабийле китапханагъа келселе, кеслерин арталлыда башха тюрлю жюрюте,

Интернетден айырылып, китапланы багъаларгъа, сюерге юйренедиле. Аны себепли ол кесини ишинде дерслени классдан тышында бардырыуну хайырланыргъа бек сюеди. Бютюнда школну мекямындан узакъ болмай, омакъ, шёндюгюлю сабий китапхананы болгъаны анга бу амалны хайырланыргъа онг береди.

Кёп болмай малкъар адабиятны дерсин  ала китапхананы таматасы Аппайланы Анжела бла бирге жарашдырып бардыргъандыла. Ол дерс Зумакъулланы Танзиляны жашау эм чыгъармачылыкъ жолуна аталгъанды. Китапханада лицейчилеге къонакъбайлыкъ этген Анжела Сагидовна

Танзиляны юсюнден медиаматериалла хазырлап кёргюзтгенди. Видеороликге окъуучула сюйюп къарагъандыла. Поэтни быйыл 90-жыллыкъ юбилейин белгилеуден да хапар алгъандыла. Къонакъбайгъа кеслерини фахмуларын да сюйюп кёргюзте, поэтни биографиясындан билген шартларын айтхандыла. Назму окъуулары бла къууандыргъандыла. 

- Классдан тышында бардырылгъан дерслени бизни окъуучуларыбыз бек жаратадыла. Артыгъыракъда бу китапханагъа тынгылы ремонт этилип ачылгъанлы, алагъа мында хар не да хычыуун, сейир кёрюнеди.

- Биз къуру да айтып кетгенден эсе, къайсы теманы да суратлау пособияла бла бегитгенибиз аланы эслеринде игирек къалады. Назмула айтып эришиуню бек сюедиле. Бир жол билалмай къалгъан сабийчикле экинчи кереге бютюнда жууаплы хазырланнганлары къууандырады, - дейди сынамлы устаз Жулдуз Ахматовна.

Жарсыугъа, сау бир тёлю тиллерин билмей, бирге да излемей къалгъандыла. 

- Бусагъатда сабий садладан башлап ана тилни дерслерин къайтарсала, ол бек уллу себеплик этерикди. Школгъа сабий бир да болмаса эм бош эм керекли затладан хапары болуп келликди. Алай бу ахыр эки жылда атала бла анала да тилни сакъларгъа керек болгъанын ангылай башлагъанча кёрюнеди. Кеси ана тилин билмеген сабийни билим мурдору къарыусуз болгъаны илму жаны бла тинтиуледе да тохташдырылгъанды. Аны себепли быллай аламат дерс къурау амалланы устазла кенг хайырлансала, магъаналы боллукъду. Сабийчикле, бизни гинжи театрыбызда кеслери тауча жомакъла кёргюзтюр онглары болгъанын кёрюп, бюгюн бек къууаннгандыла. Мени оюмума кёре, тилге юйрениуде оюнну магъанасы уллуду. Ахыр жыллада уа методика керекле кёпден кёп чыгъа барадыла. Аны айтханым, устаз эригиулю дерследен къачып, окъуучуну дерс заманын сейирли этер ючюн, керекли материалла табарыкъды. Биз да не жаны бла да алагъа себеплик этерге, болушургъа, сахна оюнла салып кёргюзтюрге юйретир ючюн хазырбыз, - дегенди Анжела Сагидовна.

Китапхананы таматасы сабийлеге ол кюн Зумакъулланы Танзиляны китапларындан кёрмюч хазырлагъан эди. Аны да уллу хайыры неде болгъанды десегиз, сабийле, китапланы алып, аладан билмеген, танымагъан жангы назмула бла шагъырейленнгендиле.

Мындан ары да устаз бла китапхана къаты байламлыкъда ишлер муратлыдыла.