Эгечини ызы бла баргъанды

Быйыл Къабарты-Малкъар къырал университетни медицина академиясыны «Багъыу иш» ызын юч жюз адам бошагъанды. Аланы санында билимге, илмугъа итиниулюклери бла айырмалыла  къызыл дипломланы алгъандыла. Ол тизмеде уа онюч таулу жашны бла къызны барлыкълары бизни да къууандыргъанды. Аладан бири Алийланы Темирланды.

Темирлан Кёнделенде ёсгенди. Юйюрню ийнагъы болгъаны бла бирге уа, эсли жашчыкъны хар неге да сейири энчи эди. Бютюнда бег а ол юйде киштиклерине уколла этип, алай ойнаргъа сюйгенди. Артда, бир кесек абаданыракъ болгъанында уа, тамата эгечи Аминатны элде терк болушлукъ берген станцияда ишлей, жамауатха къаллай себеплик этгенин кёргенди. Алай бла, ол акъ халатны киерге, врач болургъа бютюнда талпыннганды.

Биринчи классдан да иги окъуп, элде экинчи номерли битеулю билим берген мектепде тогъузунчуну «бешлеге» бошап, Нальчикде медколледжге сынаула да бермей, алай киргенди. Окъууда алай жетишимли болгъан жашны тогъузунчудан нек кетгенине бирле сейир этген эселе да, ол а, заманын оздурмай, медицина кертиси бла да аны жолу болгъанын бла къалгъанын ангыларгъа излегенди.

Алий улу окъууда, билим алыуда кесин аямагъанын белгилерчады.  Нек дегенде ол колледжни ючюнчю курсунда окъуй тургъанлай, андан сора да,  ара шахарыбызны биринчи номерли лицейине онунчу классха киргенди. Алай бла уа, Бир къырал экзаменлени, университетни кесинде берилген (аланы медколледжни бошагъанла бередиле) сынауланы да жазып, аладан къайсыларында бийик балла алаллыгъын кёрюрге, кесин сынаргъа сюйгенди.

‒ Жашырмайма, колледжде, лицейде да бирча окъугъан къыйын эди. Алай эсе да, онунчу-онбиринчи классланы да бир жылгъа экстерн амал бла къызыл аттестат бла бошагъанма. Колледжни да къызыл дипломгъа тауусханма. ЕГЭ-леде бла КъМКъУ-ну ичинде берилген сынаулада экилеринде да, не сейир, бирча иги балла алгъанма. Алай эсе да, лицейде окъугъаныма аз да сокъуранмайма. Нек дегенде репетиторлагъа жюрюмегенме, жаланда дерследе алгъан билимими хайырланнганма, ‒ деп хапар айтханды кеси да.

Белгилегенибизча, ызы бла КъМКъУ-ну медицина академиясына киргенди. Анда уа волонтёр клубну келечиси да болгъанды, илму конференциялагъа, тюбешиулеге да баргъанды.

Сёз ючюн, Ставропольну къырал медицина университетинде врач усталыкълада жаланда «бешлеге» окъугъан студентлени жыйылыуларын къурау энди эрттеден бери да ахшы тёреди. Таулу жаш да анда «Иги окъугъанланы академиясы» атлы илму тюбешиулеге хар жолдан да баргъанды. Биринчи, экинчи жерлени алып, дипломла бла саугъаланнганды. Илму бла кюрешгенини юсюнден толуракъ айтсакъ, ол ковидден ауругъанланы саулукъларын Къабарты-Малкъарны санаторий эмда курорт болумларында игилендириу бла байламлы патентни авторуду. Аны илму башчысы уа медицина илмуланы кандидаты Ачабайланы Айшат Борисовнады.

Дуния пандемия болумлагъа тюшгенинде уа, волонтёр нёгерлери бла бирге коронавирусдан къыйналып тургъанланы юйлерине дарманларын, аш-суу продуктла да келтирип, болушлукъ этгенди. Аны бла да къалмай, Нальчикни биринчи номерли клиникалы больницасыны мурдорунда ачылгъан эм къоркъуулу жукъгъан ауруулагъа къажау госпитальда ковидни экинчи толкъунунда саусузлагъа себеплик этерден къалмагъанды. Аны ючюн а республиканы оноучуларында, жамауатдан ыспасха тийишли болгъанды. Кеси да бу ауруудан юч кере къайтып къыйналгъан эсе да, этген сайлаууна кертичилей къалгъанды.

Медицина ызда билим алгъан тынч жумуш болмагъанын барыбыз да ангылайбыз. Алай эсе да, окъуй тургъанына да къарамай, Темирлан туугъан элинде терк болушлукъ берген станцияда ишге да киргенди. Анда шабат кюнледе дежурствола бардырып, кёплеге болушлугъун тийдиргенди. Инсульт неда инфаркт болуп къалгъанланы мычымай Нальчикге жетдирирге  тюшгенинде да, апчымай, билген амалларын хайырланнганды. Элде врачланы жетишмегенлери да аны жарсытханлай турады.

Айхай да, бош заманы да азды. Болсада атасына бла анасына болушлукъгъа ол бир заманда да тасха тюшюрмейди. Бичен хазырлауда, бахчада да себеплик этеди. Ала аны, тамата эгечлерин да иш юсюнде чыныгъыулукъда юйретгенлерине да ыразылыгъын айтады.

Аны малкъар тилде шатык сёлешгенин да белгилерчады. Нек дегенде элде ёсгенле окъуна арт кезиуде аны иги ангыламагъанларын, биз сюйгенча хайырланалмагъанларын кёре келебиз. Аны себепли уа аны юйретгенле, ёсдюргенле да хурметге тийишлидиле.

Мындан арысында да Темирлан илму бла кюрешир умутдады. Мураты толса, ахшы невролог болуп, жамауатха, бютюнда бег а инсультдан сора санлары ишлерге унамай тохтагъанланы саулукъларын игилендирирге эс бурургъа талпыныпды. Аны бла байламлы бюгюнлюкде КъМКъУ-ну ординатурасына кирип, билимин андан ары ёсдюре турады.