Жангы жылгъа тийишли халда тюберча

Нальчикни  айнытыу жаны бла «Платформа» институтну келечилери Жангы жылгъа тийишли халда тюберча хазырланып башлагъандыла.  Ол санда  шахарны энчилигин белгилерча этерге сюйгенлерин да  ачыкълагъандыла.  

Жангылыкъланы шартларындан бири «Нальчикде къышда»  деген чакъырым боллукъду.  Ол  сувенирледе,  открыткалада, саугъалада, баннерледе эм Къабарты орамда   экспромт-галереяда суратлада да жазылылкъды. 
«Платформы» институтну арт-координатору  Аккызланы Керим да кеси дизайнер шрифт къурагъанды. Ол да байрам проектге ахшы къошумчулукъ боллукъду.

- Ол Нальчикге графикалы саугъады. Аны шахарны кёп жерлеринде кёрюрге боллукъду.  КъМКъУ-ну архитектура, къурулуш эм  дизайн институтуну  студентлери бла преподавательлери Арбатда   шрифт леттеринг эм   метафорала халда къыш кезиуге атап  алгъышлаула жазарыкъдыла- дейди  Аккызланы Керим.

 Ол айтханнга кёре, шахарны кёрмючлеринде тематикалы суратла эм картинала да кёргюзтюллюкдюле.

Нарат терекге такъгъан илляуну   ким сейирин жарашдырса эм сатыу-алыу точкаланы бирсиледен  омакъ жасаса да деп,  эки тёрели конкурс бардырыллыкъды.  Биринчисине  школчула, экинчисине уа предпринимательле къатышырыкъдыла. Эки номинацияда да хорлагъанны жюри белгилерикди. Ала бирсиледен кёбюрек балл алыргъа керек боллукъдула.