Жангы минг сомлукъгъа сурат айырыугъа къатышыгъыз

Россейни Банкы жангы 1000-сомлукъ къагъыт ахчаны юсюнде къаллай сураты боллугъун айырады эмда бу жумушха хар кимни да къатышыргъа чакъырады. Къабарты-Малкъарда инсанлагъа да къошулугъуз анга,  дейдиле Банкны республикада бёлюмюнде.

Ахчаны сыфаты Приволжский федерал округга жораланады. Аны бет жанында Тёбен Новгородну сураты ишленипди. Жамауатха аны былтыр кёргюзтген эдиле, ол тюрленмей,  алайлай къаллыкъды. Бирси жанында суратха къол кётюрюу а «Россей» Миллет араны болушлугъу бла барады. Анга битеу къыралыбыздан ким сюйсе да къатышыргъа эркинди.

«Интернетде тийишли бетде Приволжье тийреден бир ненча объект кёргюзтюледи.  Ала  белгили жерледиле, къуру анда жашагъанлагъа угъай, саулай къыралыбызгъа да маданият эмда тарых жаны бла магъаналыдыла. Ол санда музейле, эсгертмеле, театрла, университетле, кёпюрле да бардыла – битеу да жыйырма беш боладыла. Хар инсан жаланда бир объектни айырыргъа эркинди. Барындан да кёп къайсылары сайлансала, аланы Россейни Банкыны эмда Госзнакны суратчылары ол ахчаны жарашдыргъанда хайырланырыкъдыла», - дегенди Банкны КъМР-де бёлюмюню башчысыны экинчиси Балаланы Расул.

Кёбюсюнде ахчаны бетинде юч къауум сурат ишленеди. Ал жанындагъы ол неге жораланнганын шарт кёргюзтеди, кеси да танышыулу, къадар ууакъ затсыз болургъа керекди. Аны арт жанындагъы сурат баш теманы тутады, аны толуракъ ачыкълайды эмда къууат береди. Андан сора уа ючюнчю объектле ишленедиле, ол ууакъ эмда гитче ызла, сора суратчыкъла болуучудула.

Айтылгъан затланы барын да ахчаны юсюне тюшюргенде, аны къоруулау затларын жапмай, тап кёрюнюрча,  алай тизедиле. Минг сомлукъну сыфаты къаллай боллугъун Россейни Банкыны башчыларыны Совети оноулашып тохташдырлыкъды. Къол кётюрюу https://cbr.ru/cash_circulation/simvoly-dlya-banknot/ сайтда 12 декабрьде кюндюз сагъат онекиге дери барлыкъды.