Аскерчилени хурметлерин кёрюп

Солуу кюнледе Къашхатауну физкультура-саулукъну кючлеу комплексинде энчи аскер операциягъа къатышхан аскерчилени хурметлерине аскер эм спорт самбодан ачыкъ республикалы турнир ётгенди. Анга 8-18 -жыллыкъ спортчула къатышып, кеслерини усталыкъларын ачыкълагъандыла. Жыл санларына кёре, ала эки къауумгъа юлешинип эришгендиле.

Эришиуню КъМР-ни Аскер самбодан федерациясы къурагъанды. Анга республиканы шахарларындан бла районларындан 150-ден артыкъ спортчу къатышхандыла. Турнирни къууанчлы ачылыууна чакъырылгъан къонакъланы араларында уа РФ-ни Аскер самбодан федерациясыны вице-президенти Апти Яндиев, малкъар халкъны «Бирлик» деген тукъумла советини таматасы Сумайланы Ахмат, Черек районну администрациясыны башчысыны орунбасары Уяналаны Азрет, «Ата журтну къоруулаучулары» фондну КъМР-де бёлюмюню таматасыны орунбасары Чеченланы Эльдар, КъМР-ни Дин управлениясыны таматасыны орунбасары Мисирланы Хызыр, генерал-майор Газаланы Сауарбий, «Эльбрусоид» эм «Барс Эл» жамауат организацияланы таматалары Аналаны Марат бла Герийланы Абузеит, РФ-ни МЧС-ини КъМР-де Баш управлениясыны таматасыны орунбасары Аналаны Магомет эм энчи аскер операциягъа къатышханла бар эдиле.  

8-9-жыллары толгъан спортчуланы къауумунда эришиуле спорт самбону тутушуу тюрлюсюнде бардырылгъандыла. Абаданла уа аскер самбода сермешгендиле.

КъМР-ни Аскер самбодан федерациясыны президенти Кючмезланы Азрет билдиргеннге кёре, командалы зачётда биринчи жерге «Эльбрус» спорт клуб, экинчи эм ючюнчю жерлеге уа «Файт-Зона» эм Огъары Жемталаны дзюдочулары чыкъгъандыла.

«Эльбрусчула» бу турнирде 13 - «алтын», 7 «кюмюш» эм 6 «доммакъ» къытхандыла. Жашланы тренерле Жантудууланы Азамат, Башийланы Альберт эм Ёлмезланы Дагиб юйретгендиле.