Тау артындан келип юйюр къурагъан эди

Нижерадзе Георгий Гаврилович битеу Гюржюде да аты айтылгъан адам эди. Ол кеси медицина жаны бла бийик билим алгъан биринчи эбизе болгъанды. Георгий Гаврилович, Одесса шахарда окъууун бошагъанлай, биринчи дуния уруш башланады.

Аскерге чакъырып, Нижерадзени медицина бёлюмге тамата этип саладыла. Анда къуллугъун бошагъандан сора уа ол, Сванетиягъа къайтып, туугъан жеринде больница ачады.

Бир ауукъ заманны доктор Земо-Сванетияны толтуруучу комитетини председателини къуллугъун толтуруп турады. Артда уа Местиа шахарны больницасында терапевт болуп ишлейди. Ол Уллу Ата журт урушха да тири къатышханды.

Андан сора да,  Местиа шахарны больницасында  врач болуп  1967 жылгъа дери ишлегенди. Нижерадзе 1968 жылда  ауруп ёлгенди. Анга ол заманда сексен жыл бола эди. Медицинагъа уллу  къыйын салгъаны ючюн анга «Гюржюню сыйлы врачы» деген ат аталгъанды.

Георгий Гавриловични къатыны Огъары Бахсандан Дадешкелиани Жансохну къызы Кемилят эди. Кемилятны анасы уа - Орусбийланы Биясланны къызы Мисирхан. Дадешкелианиле Сванетияны бийлеридиле.

Революциягъа дери Бахсан ауузуну бийлери Орусбийлары Тау  Артына аууп, ала бла байламлыкъ жюрютюп болгъандыла. Бир жол Огъары Бахсаннга Орусбийлагъа къонакъгъа Дадешкелиани Жансох келеди. Къауум кюн да турады. Ол кезиуде Орусбийланы Биясланны къызы  Мисирханны кёрюп, аны жаратады,  сюеди.

Мисирхан ариу, чырайлы адам эди, адет-намыс, къылыкъ жаны бла да айтханда да, хар неси да ариулугъуна келишген. Андан  сора да, эки къолу сары алтын, ислам диннге да жюреги бла къаты берилген.

Жансох Мисирханны тилейди да, Орусбийлары къызларын анга берирге унамайдыла. Мисирхан а  аны  жаратхан этгенликге, кимден, неден да бек динин сюйгенди. Жаш, ишни алайлыгъын билип, ислам дин бла шагъырей болуп  тебирейди. Аны тюзлюгюн, кертилигин да ангылап, ол динни алады.

  Андан сора сванлы князь Дадешкелиани Жансох ислам динде болгъандан сора,  экиси да юйюр къурайдыла. Жансох Мисирханны алгъандан сора Огъары Бахсаннга кёчеди. Анда юй-журт ишлеп тохташады.

 Аланы  эки жашлары бла эки къызлары болады. Уллу жашлары Ислам граждан урушдан сора  Азербайджаннга кетип, анда жашап тургъанды. Ислам эки къатын алгъан эди. Биринчи къатыны чегемли болгъанды. Кючюкланы Абидат. Гитче жашлары Гюржюге кетип анда ауруп ёледи. Аны юйдегиси жокъ эди.

Репрессияла башланнган заманда, къызлары Кемилятха бла Фатиматха хата жетер деп, къоркъуп, Мисирхан аланы Тау Артына-Сванетиягъа-Жансохну ата юйюне ашырады.

Жансохну анасы, Мисирханны уа къайын анасы къарачай бийледен болгъанды, Дудаладан.

Мисирханны къызлары айтып-айтмазча аллай ариула эдиле.Кемилят Сванетияда Георгий Нижерадзе бла шагъырей болады да, кёп да турмай,  анга эрге барады. Тойгъа Бахсандан келгенлеге анда бек аламат тюбейдиле. Кёп сый салып да ашырадыла.

Анасы Мисирхан а Кемилятны ол ишин жаратмай, бир заманда ыразы да бомлагъанды. Гяуургъа баргъаны ючюн, кечген да этмегенди.

Георгийни  бла Кемилятны бир жашлары, бир къызлары болады. Жашларына да Георгий деп атагъандыла.  Ол жанында бир заводну директору болуп тургъанды.

Къызлары Люба уа, атасыны жолун сайлап, Местианы больницасында врачлыкъ этгенди.   Аны саусузлагъа къарагъаныны, бакъгъаныны юсюнден Тау Артында таурухла окъуна жюрюгендиле. Узакъ эллеге, таулада малчылагъа да жетип, болушлукъ этип тургъаны ючюн  1968 жылда анга «Социалист Урунууну Жигити» деген сыйлы ат берилген эди.

Кемилятны эгечи Фатиматны къадары уа былай болгъанды.

Отузунчу жыллада Мисирхан къайын анасыны къарындашындан туугъанла-Дудалары жашагъан Кисловодск шахарны тийресине кёчеди. Жансох, Фатимат башха динли адамгъа ажашыр деп, аны да алып, Мисирхан болгъан жерге келеди.

Анда жашай тургъанлай, бир жыл саны келген къарачайлы киши Фатиматны зор бла алып къачады. Юйге жетип тюшюргенлеринде, Фатимат,  аны къачыргъанла эс жыйгъынчы, алайда  атха минип къачады. Болсада иш аны бла бошалып къалмайды.

Ким биледи, ол адам кесине базыннган киши болур эди ансы, Фатиматны ызындан къысха тюшеди. Экинчи кере да къачырады. Ол артыкълыкъгъа   тёзалмай, Фатимат акъылдан шашады. Аны Владикавказда больницагъа саладыла. Таулула Азиядан къайтыр жылланы аллында ёлгенди.

Дадешкелиани Жансох кёчгюнчюлюкню аллында, Кисловодск тийресинде, тургъан элинде ауушханды. Мисирхан а жууукълары бла Къыргъызстаннга тюшген эди. Ол а анда ёлгенди.

Тау  Артында келип  Огъары Бахсанда юйюр къурагъан сванлыны  жашау жолу алай эди.