Шуёхлукъну кючлерге жораланнган байрам

Бу кюнледе Къулийланы Къайсын атлы Малкъар къырал драма театрда «Мистер хозяин и Мисс хозяюшка - 2024» деген эришиу болгъанды. Аны  да «Ашхана» проектни къурагъан Мокъаланы Гульнара бардыргъанды. Жыл сайын анга республикада жашагъан башха-башха районладан сабийчикле къатышып, аш хазырлагъанлары эмда башха усталыкълары бла къууандыра тургъандыла. Быйыл а проект андан да уллу болгъанды.  Анга жангыз да республикадан угъай, СКФО-дан  келечиле да къатышхандыла, аланы санында Пятигорскдан Эммануэль Готерон, Шимал Осетия-Аланиядан  Сабина Ваниева, Къарачай-Черкесден Чомайланы Лейля, Ингушетиядан  Мухаммад-Амин Котиков, Къабарты-Малкъар Республикадан а Тохаланы Ильнара. 

Сабийлени ишлерин тинтирге келген жюрини санына уа «Минги-Тау» журналны жууаплы секретары Шауаланы Разият, предприниматель Гузеланы Индира, КъМР-ни  халкъ артисти, Парламентни  комитетини таматасы Текуланы Амур, КъМР-ни халкъ артисти Ауэс Зеушев, «Нюр» журналны баш редактору Сабанчыланы Арипа киргендиле. 

Белгилисича, бу проект жети жылдан бери бардырылгъанлай турады. Аны себепли байрамгъа озгъан жыллада  алчыла болгъан сабийле да келгендиле. Сабий жюри да  къуралгъанды, ала да кеслерини оюмларын билдиргендиле. Ол сабийлени санына Гуппойланы Динара, Къараланы Салида, Жашууланы Джамиля, Чабдарланы Камила, Ботталаны Алим, Амир Ансоков, Амалия Луева киргендиле. Байрамгъа къараргъа,  аны сабийлерине кёргюзтюрге сюйгенле да кёп болгъандыла. Проектни чеклеринде биринчи жерни алгъан къызчыкъгъа кюрен (корона) кийдиредиле, сау жылны ол анда турады, экинчи жыл а ол аны келтирип, энди хорлагъан сабийге береди, бу тёре жылдан- жылгъа ётгенлей барады. 

Алай бла эришиуге къатышырыкъ сабийлени сахнагъа чакъыргъандыла. Аланы барысын да жюрини санында болгъанла алгъышлап, быллай эришиу бек керек болгъанын да чертгендиле. Эришиу къауум кезиуден къуралгъанды. Биринчиси «Визитная карточка»: анда сабийле кеслерини юсюнден айтхандыла, не бла кюрешгенлерин, бу проектге келирге нек сюйгенлерин да билдиргендиле. Экинчи «Турист болгъан игиди» деген: анда хар сабийле кеслерини республикаларыны юсюнден айтхандыла.

Къаллай аламат табийгъатлары, тарыхлары, маданият байлыкълары болгъаныны юсюнден видеороликле хазырлап кёргюзтгендиле. Ючюнчю кезиуде уа эришиуге къатышханла барысы да сахнагъа чыкъгъандыла, алагъа тюймени кийимге тигерге буюргъандыла. Бир такъыйкъаны ичинде къайсы теркирек эмда ариу тикгенине къарагъандыла. Тёртюнчю кезиуде уа хар бири да кеслерини хунерликлерин кёргюзтгендиле. Сабийле аламат жырлай, тепсей, назмула айта билгенлерин,  спорт жаны бла кюрешгенлерин да туура этгендиле. Бешинчи урумда уа хар бири да миллет азыкълары бла шагъырейлендиргендиле. Ала юйлеринде хазырлап келген бир миллет ашны кёргюзтгендиле. Азыкъланы санында малкъар, къарачай хычинле, дюгер пирогла, торт да болгъанды. Сабийле аланы нек этгенлерин эм тарыхда къаллай магъаналары болгъанын да билдиргендиле. Сора ол аламат ашла бла жюрини, келген къонакъланы да сыйлагъандыла.

Эришиуню ахырында уа сабийле кеслерини республикаларыны байракъларын алып, сахнагъа чыкъгъандыла. Жюри аланы къайсы жерлеге тийишли болгъанларын билдиргенди. Быллай тюбешиуледе хар жашчыкъны, къызчыкъны да иги хазырланып, миллетини маданияты, тарыхы бла да шагъырей эте билгенлери бек аламатды. Алай бла «Мисс хозяюшка» Шимал Осетия-Аланиядан Сабина Ваниева, «Мистер хозяин» а Пятигорскдан Эммануэль Готерон болгъандыла. Ызы бла сахнагъа былтыр эришиуде хорлагъан Умарланы Мухаммат (Кичибалыкъ) бла Улбашланы Амира (Бабугент) чыгъып, сау жылны алада тургъан кюренни бла башлыкъны быйылгъы алчылагъа кийдиргендиле. Келгенлени «Насып», «Эдельвейс» тепсеу ансамбльле, жырчыла да къууандыргъандыла.

Мокъаланы Гульнара уа жыйылыугъа келгенлени барысына да ыразылыгъын билдиргенди. Быллай проектледе себеплик этип тургъаны ючюн Муртазланы Ларисагъа энчи жылы сёзлерин айтханды. Андан сора да, бу ишде болушхан, спонсорлукъ этген Жангоразланы Мажитге, Бабаланы Заургъа, Заммаланы Асиятха, Зубайдат Мурадовагъа, Эндрейланы Жамилягъа, Доттуланы Мадинагъа, Таукенланы Людмилагъа, Болатланы Лейлягъа да ыразылыгъын айтханды. Быллай жыйылыула сабийлени бир бирлери бла танышдырыргъа, ортада байламлыкъ жюрютюрге да болушханларын чертгенди.  Экинчи жыл а башха республикадан быйыл келалмай къалгъан сабийлени чакъырлыгъын да билдиргенди. Гульнара дагъыда бу эришиуде алчыла болгъан сабийлени Москвада бардырыллыкъ проектге чакъырыкъларын да туура этгенди.