Жарым ёмюрню – биргелей

Быллымда  Ахматланы Хамзат бла Земфира бир юйюр къурап жашагъанлы 50 жыл ётгенди. Кёп болмай а элни Маданият юйюнде Ананы кюнюне аталып бардырылгъан жарыкъ байрамны кезиуюнде юйюрню сыйын кёргендиле. Тёрт сабий ёсдюрген ата-ананы  алгъышларгъа ол кюн Элбрус районну Тиширыула советини таматасы Моллаланы Зарета да келген эди. 

Хамзат бла Земфира халкъыбызны кёчгюнчюлюкде туугъан тёлюсюндендиле. Экиси да Къазахстанны Джамбул областында туугъанлыкъгъа, танышыргъа уа Аллах Ата журтларында буюргъанды. Аскер борчун Горький шахарда толтуруп къайтхандан сора,Хамзат Алиевич КъМКъУ-ну инженерле хазырлагъан факультетине заочно окъургъа киреди эм Тырныаууздагъы шахта-къурулуш управленияда ишлеп башлайды. Анда тамата инженерни къуллугъуна дери жетеди. Бара-баргъанда уа кесини энчи предприятиясын да ачады.

Эфендиланы Рифхатны къызы Земфира уа жашауун багъыу иши  бла байламлы этерге сюйюп, медицина училищеге кирип, фельдшер эм акушер усталыкъланы алып чыгъады. Огъары Басханда фельдшер болуп ишлегенди, ызы бла уа Тырныауузну сабий садларында медсестралыкъ этгенди. 

Танышхан а Хамзат бла Земфира 1971 жылда экисине да къаршы болгъан жууукъларында этгендиле. Бир юйюр къураргъа уа ала юч жылдан сора таукел боладыла. Алай бла Ахматланы юйюрлеринде 4 сабий тууады: юч жаш бла бир къыз. Алагъа ата-ана тийишли билим алдыргъандыла. Тамата жашлары Магомет, атасыча, къурулушчу болуп ишлейди. Азрет экономистди. Бюгюнлюкде Тюркде жашайды. Жаннета, юридический билим алып, ич ишлени органларында къуллукъ этеди. Мурат а ата-анасы бла элде жашайды. 

Земфираны бла Хамзатны 8 туудукълары бардыла. Аладан бир къаууму да студентледиле. Ынна бла аппа сабийлерини бла аладан туугъанланы харкюнлюк жашауларыны юсюнден соргъанлай, къайгъыргъанлай турадыла. 
Элде Ахматланы юйюрню сыйлары жюрюйдю. Алагъа уллу-гитче да хурмет этедиле. Ма ол кюн да Быллымны Маданият юйюне чакъырылгъан къонакъла алагъа къызыу къарсла бла тюбегендиле эм алгъыш сёзлеге къошулгъандыла.