Жерлеге дайым кёз-къулакъ болуу

Россельхознадзорну башчысыны орунбасары Антон Кармазин, жерлеге кёз-къулакъ болгъан къырал органла бир бирлери бла байламлыкъланы жюрютюуню юсюнден бу кюнледе видеоконференция халда кенгеш бардыргъанды. Аны ишине КъМР-ни эл мюлк министрини орунбасары Мачраил Шетов да къатышхан эди, деп билдиргендиле министерствону пресс-службасындан.

Жыйылыуда  жерле бла байламлы законодательствогъа кёре къырал контроль къалай этилгенини, муниципалитетледе уа бу жаны бла иш къалай къуралгъаныны юсюнден сёлешиннгенди. Аланы экилерини арасында байламлыкъланы андан да иги къалай этерге боллугъу  сюзюлгенди. Анга кёре жерлени хайырланыу эмда сакълау жумушланы къыйматларын кётюрюрге боллугъун да чертгендиле. Андан сора да,  Россельхознадзор бла Росреестр  муниципал жерлеге  контроль этиу  органла бла быйыл ал тогъуз айны ичинде къалай ишлегенин тинтгендиле. Антон Кармазин ол органланы ишлеринде кемчиликлеге эс бургъанды, келир кезиулеге борчланы да туура этгенди.

Кенгешде айтылгъаныча, Къабарты-Малкъарда жерлеге  контроль этиуню  къыйматлылыгъын кючлендириу бла кюрешген оператив штаб ишлейди. Анга кирген къурамланы   араларында   тынгылы байламлыкъла жюрютюледиле. Дагъыда хар квартал сайын штаб, жыйылып, кезиулю жумушлагъа къарайды, ведомствола, учрежденияла эмда муниципалитетле бардыргъан ишни сюзеди, тийишли оноула этеди.

Видеоконференциягъа дагъыда Россельхознадзорну Шимал Кавказда регионла  аралы управлениясыны, Росреестрни КъМР-де бёлюмюню эмда республиканы жер эмда ырысхы бла байламлы халланы  министерствосуну келечилери къатышхан эдиле.