Иги кесек соруугъа къаралгъанды

Къабарты-Малкъарны Регионнга оноу этиу жаны бла арасы (ЦУР)  республиканы инсанлары бла власть органланы арасында байламлыкъны жалчытырча эм чыкъгъан соруула къысха заманда  тамамланырча ишни  тири бардырады.  Аланы кёбюсю социал сетьледе «Telegram», «Одноклассники», «ВКонтакте» кётюрюлген «Инцидент Менеджмент» системаны амалы бла жарашдырылгъан проблемаладыла. 

Анга кёре озгъан айда Арагъа социал  сетьлени себеплиги бла юч  мингден аслам соруу берилгенди.  Аланы кёбюсю, хар замандача, социал къоруулау, жашау журт-коммунал мюлк, тийрени игилендириу, жолланы тапландырыу, саулукъ сакълау бла байламлыдыла. Специалистле, аланы хар бирине  тынгылы къарап, профильлерине кёре  тийишли ведомстволагъа билдиргендиле.

Тарыгъыуланы кёбюсю Нальчик бла Прохладный шахар округлада эм Чегем муниципал районлада жашагъанладан келгенди.  Алгъа заманда жууап берилирча иги кесек сакъларгъа тюшгени  кёплеге тап болмагъанды. Энди уа, орта эсеп бла алып айтханда, бир сагъат бла жарымдан  кёпге созулмагъаны ишни бютюн жетишимли бардырыргъа онг тапдырады.  

Сагъынылгъан кезиуде ЦУР республиканы  районларында тийишли инстанциялы себеплиги бла эркинликсиз  кир-кипчик тёгюлген жерлени  къурутургъа,  жылыу,  таза суу бла жалчытыргъа, жолланы жангыртырча, кече   жарытырча эм башха жумушланы тамамларгъа болушхандыла.
ЦУР озгъан айда социал сетьледе кётюрюлген жарсыулагъа аслам халда эс бургъан муниципалитет къурамланы бла регион ведомстволаны эсеплерча тёрели рейтинг да ётдюргенди.

Эсеплени чыгъарырдан алгъа сорууланы къаллай бир заманны ичинде тамамланнганларына, тынгылы толтурулгъанларына эм башха шартлагъа да эс бурулгъанды. Алай бла бу жол биринчи жерге КъМР-ни Саулукъ сакълау министерствосу тийишли болгъанды. Экинчи, ючюнчю жерлеге Транспорт эмда жол мюлк министерство бла Тарифле эмда жашау журтлагъа надзор  этиу жаны бла къырал комитет  чыкъгъандыла. Муниципалитетлени юсюнден айтханда, биринчи жерни Бахсан шахар округну администрациясы алгъанды. Урван бла Бахсан  районла экинчи бла ючюнчю жерледедиле.  

Рейтинг  биринчи кере 2021 жылда бардырылып тебирелгенди.  Аны магъанасы толтуруучу власть органла бла жер-жерли самоуправленияланы ишлерине багъа бичергеди эм власть бла жамауатны арасында байламлыкъны айнытыргъады.

Андан сора да, «Жарсытхан соруула» рубриканы чеклеринде министерстволаны, ведомстволаны жер-жерли администрацияланы таматалары бла тюзюнлей эфир бардырылгъанды. Студияда къонакъда  Прохладна районну  администрациясыны башчысы Андрей Журавлев, КъМР-ни тынгылы ремонт этген фондуну таматасы Къулийланы  Мустафир,  Черек бла Бахсан районланы администрацияларыны башчылары  Къулбайланы Алан бла Артур Балкизов, Культура министр Мухадин Кумахов болгъандыла.  Аны кезиуюнде социал къоруулау, жолла, билим бериу, ТКО, ЖКХ, саулукъ сакълау, курортла эм спорт бла байламлы жюзден аслам соруу сюзюлгенди.

Эсге сала айтсакъ, Регионнга оноу этиу ара офис халда ишлемейди, «Инцидент менеджмент» бир тюрлю соруугъа  эс бурурча социал сетьлени биринде сагъынылыргъа  эм  тынгылыракъ ачыкъланыргъа  керекди.