Газет не заманда да халкъ бла биргеди

Жер башында битеу халкъланы миллетликлерин, энчиликлерин театрлары, адабиятлары, маданиятлары, газетлери, балетлери, илмулары эм башха затла ачыкълайдыла. Таулуланы бюгюнлюкде малкъар тилде басмаланнган жаланда бир газетлери барды – ол «Заманды». Аллах айтса, келлик дунияда кёп газетлерибиз болур ана тилибизде, алай бюгюнлюкде болгъанны сакъларгъа борчлубуз. Газет культура – ол кеси бир уллу дунияды. Хар бирибизни  оюмубузну миллет газетибизде басмаларгъа онгубуз барды. Жигитлерибиз, спортчуларыбыз, алимлерибиз бла «Заманны» бетлеринде шагъырей болабыз.

Газет бизни бирлешдирген этеди, алай…телефонла, компьютерле газетлени жутуп къоярламы? Бармыдыла алагъа жыйырманчы ёмюрде жер? Белгилисича, кёплери жабылгъандыла, халкъны асламысы жангылыкъланы Интернетде окъуйду.  Озгъан ёмюрдеча,  газетле сатылгъан киосклагъа тизилмейдиле энди жангы хапарланы билирге сюйгенле. Хау, бизни республикада да, битеу дуниядача, Интернетни хайырланнган адамланы саны ёсюп барады. Сёз ючюн, терроризмге къажау операция башланса, аны юсюнден билдириу видеосу бла тюз баргъан минутларында интернетде чыгъады. Аны бла байламлы кёпле: «Газетле шёндю кимге керекдиле?»- дейдиле. Алай башха къыралланы сынаулары кёргюзтеди: Интернет айныгъанлыкъгъа, газетле ёлмейдиле. Сёз ючюн, Германияда хакъсыз басмаланнган газетле бек кёпдюле: бу  къырал басма газетлени даражаларын тюшюрмейди.

Энчи «Заман» газетни юсюнден айтханда, кесибизни адамларыбыз – таулула - анга уллу кёллюрек  къарагъанларын  чертирге керекди. Буруннгулуланы жашауда не болумну да шарт суратлагъан сёзлери барды: «Метеке къабугъундан  жийиргеннгенлей» дегенлей, неге ушайды бизни тюзюнлей кесибизни юйюбюзден тышында бир затха да сейирибиз болмагъаны?! Миллет бла байламлы жумушлагъа барыбыз да къайгъырыргъа борчлубуз!

Не сейир, бюгюнлюкде малкъар интеллигенцияны къурагъан, тынгылы иш хакълары болгъан адамларыбыз окъуна газетге жазылыргъа излемейдиле. Бирле тауча окъуялмайбыз, дейдиле. Окъумасала окъуна, жетишимлери болгъан алимлерибизни, тепсеучюлерибизни, къурулушчуларыбызны, бизнесменлерибизни эм башхаланы суратларын кёрселе, аманмыды? Газет халкъны бир бири бла танышдырады.

Былайда бир затны энчи чертирчады: газетни даражасын жаланда журналистле угъай, халкъ къурайды.

«Заманнга» жазылыргъа унамагъанланы бир-бирлери: «Сиз башха миллетли адамланы юслеринден материалла берип турасыз»,-дейдиле. Ол терс оюмду. Газетни жигитлерини асламысы таулула болсала, ол тамамды. Асламысы, барысы да угъай! Бизни сабийлерибиз интернационалистле болургъа керекдиле. Республикада ачылгъан жангы кёрмючлеге – оруслуланы, къабартылыланы, гюржюлени, дюгерлилени эм башха миллетлилени – барыбыз да бек сюйюп, жазаргъа уа нек жарамайды? Концертле, спектакльле да алай. Бизни башха халкъла бла кёп зат байлайды. Хар бирибизни устазларыбызны араларында башха миллетли адамла кёпдюле. Устазларыбызгъа хурмет этмезге эркинбизми? Больницагъа тюшсек да, бакъгъан врачла, медсестраланы араларында башха миллетлиле аз болмайдыла. Бир бирге хурмет этерге юйренирге керекбиз.

Шёндю Москвада, Ленинградда, Россейни башха  уллу шахарларында, тыш къыраллада къаллай бир жашларыбыз, къызларыбыз окъуйдула, ишлейдиле. Ала  башха миллетли адамланы къатларындадыла. Аны себепли  бизни сабийлерибиз кеслерини миллетлерин сюйгенден сора да, башхалагъа хурмет эте билирге гитчеликлеринден юйренирге керекдиле. «Заман» газет анга да юйретеди. Биз уллу дунияда жашайбыз, газетде да ол кёрюнюрге керекди. Алай, сёзсюз, хар номерде жигитлерибизни асламысы таулула болургъа керекдиле, биз аны ангылайбыз. «Заман» газет  халкъ бла бирге айныр деп ышанабыз.