Электрокюч бла ишлеген улоулагъа себепликге

«Россети Шимал Кавказ» компания Къабарты-Малкъарда быйыл юч электрокюч станцияны сетьге къошханды. Сёз мында ток бла ишлеген улоуланы аны бла жалчытхан объектлени юсюнден барады, деп билдиргендиле компанияны республикада бёлюмюнден.

Станцияланы барына да 450 киловатт бёлюннгенди. Ала Нальчикде, Минги тауну этегинде эмда Чирик кёлледе орнатылгъандыла. Быйылны ахырына дери регионда «жашил» транспортну ток бла къандыргъан энтта да жети пункт ачыллыкъды. Бу иш «Электромобиль эмда водород бла ишлеген улоу» деген къырал проектни чеклеринде бардырылады.

Электрокюч бла жалчытыуну юсюнден айтханда уа, быйыл январьдан башлап октябрьны ахырына дери  «Каббалкэнерго» предприятие сетьлеге 2,3 минг жангы хайырланыучуну къошханды; аланы барына да 55,4 мегаватт бериледи. Сетьге къошулургъа сюйгенле  бу жумушну Портал-ТП.рф сайтда тамамларгъа, заявкаларын да ары жиберирге боллукъдула.

Бишлакъ неден этилгени белгисизди

Россельхознадзорну Къабарты-Малкъарда бёлюмю  бизни республикада качествосу ишеклик туудургъан кёп къалмай бир тонна бишлакъ чыгъарылгъанын тохташдыргъанды. Аны специалистлери «Меркурий» системаны тинтгенде, Зольск районну ветеринария арасыны ишчиси, бир предпринимательге, ол 936 килограмм бишлакъ этгенди деп, шагъатха электрон ветеринар сертификатны жарашдыргъанын билгендиле. Аны этерча 1026 килограмм сют къоратылгъанды,  деп айтыла эди. Алай ол а тюз тюйюлдю, нек дегенде, Росстатны 605-чи  номерли буйругъуна тийишлиликде, бир килограмм бишлакъ этерге 8-10 килограмм сют керекди. Ол себепден бу адам кёргюзтген сют аллай бир бишлакъ чыгъарырча жетерик тюйюл эди. Алай эсе уа, ол неден этилгенин, анга не зат къошулгъанын билир амал жокъду. Анга кёре уа продукцияны качествосуна, къоркъуусузлугъуна да ишеклик барды.

Ол предпринимательге Россельхознадзор эсгертиу жибергенди, аны юсюнден КъМР-де Ветеринария управлениягъа эмда Роспотребнадзоргъа да билдиргенди. 

Бизнес аслам кредит алгъанды

Къабарты-Малкъарда бизнес бла кюрешгенле быйыл биринчи октябрьге дери 40 миллиарддан аслам сом багъасына кредитле алгъандыла. Бир жылны ичинде бу кёрюмдю 7,4 процент къошханды, деп билдиргендиле РФ-ни Банкыны республикада бёлюмюнден.

«Кредитле бериу ёсгени, кёбюсюнде, гитче эмда орта предпринимательство тири айнып баргъаны бла байламлыды. Регионну экономикасыны мурдорун бу бёлюм къурагъаны себепли банкла да анга иги билеклик этедиле», - дегенди сагъынылгъан Банкны бёлюмюню башчысыны орунбасары Балаланы Расул.

Ол кёрюмдюню алып тергегенде, быйыл гитче эмда орта предпринимательство бла кюрешгенле банклагъа къайтарлыкъ ахча 23 процент къошуп, 27 миллиард сомдан атлагъанды. Аллай субъектлени саны тогъуз процентге кёбейгенди, финанс учрежденияланы корпоратив портфельлерини 67,4 процентин алгъанды. Аланы ичинде аслам жер ма быладады: жарашдырыучу производствола (39%) эм эл мюлк (38%).