«Тишлеригизге не къадар сакъ болсагъыз да, ол къадар саулукълу боллукъсуз»

Бюгюнлюкде тишлени багъыу-профилактика ишге аслам эс бурулады. Бек башы: пастаны тюз сайлай билирге керекди. Бу теманы юсюнден биз стоматолог Мокъаланы Валентина бла ушакъ этгенбиз.

-Пастала болушамыдыла тишлени сакъларгъа?   Аппаларыбызны- ынналарыбызны тишлери бизникиледен эсе игирек  некдиле?

- Аппаларыбыз – ынналарыбыз бизнича кёп татлы затла ашамайдыла. Бусагъатда адамла хар кюн сайын конфет ашайдыла.  Ол а саулукъну да, тишлени да бузады. Дагъыда тишлени болумлары  ашагъан ашыбыз, ичген сууубуз бла байламлыды. Адамны саулугъу оюлса, тишлери да бузулуп башлайдыла.

Пасталаны асламысы триклозан-сополимер технология бла чыгъарыладыла эм ала бюгюнлюкде бир ненча проблеманы тамамлаугъа бурулупдула.

Болсада сизни тишлеригизге хар паста  да болушурукъ тюйюлдю. Къайсы жыл санлы адамны  да ауузуна энчи къарау изленеди, сёзсюз, пастаны стоматологну айтыууна кёре алыргъа керекди.

Кариесге къажау  фтор, фосфор неда кальций бирге къошулуп жарашдырылгъан пасталадыла. Тири  фтор тишлени кислоталагъа къажау кюрешлерин кючлейди, эмальда минералланы кёбейтеди, бактерияланы ишлерин къарыусузландырады - кариес чыкъмазча этеди.

Фторлары болгъан пастала кариес болмазча  жюрютюледиле, эмальны кючлейдиле, бюгюнлюкде  ала эм белгили къошулмаладыла.

Пастада фтор  къаллай бир кёп эсе, ол паста кариесге къажау кюрешде аллай бирге къыйматлыды. Башха затла, сёз ючюн, кальцийлери, фосфатлары неда ксилитлери болгъан пастала башха пасталагъа къошакъ болушлукъчулагъа хайырланылыргъа  боллукъдула.

  Фтор асыры кёп болса,  сабийлени сют тишлерине заран келтиреди - флюороз аурууну (эмальда акъ тамгъаланы) чыгъарыргъа боллукъду. Сабийлеге энчи сабий пастаны алыргъа керекди, анда  фторид азыракъды.

- Пастала къаллай тюрлюле боладыла?

-Акълаучу пастала эки тюрлюге юлешинедиле: зыбырыракъла эм тири химиялы веществолары болгъанла. Пасталаны биринчи къаууму тишлени тышларын иги ариулайдыла,  алай ала тишни тышын бузаргъа да боллукъдула. Алай  бла уа тишле бютюнда бек саргъаладыла, бузулгъан  эмальны тюбюнде сары  дентин кёрюнюрюкдю. Ол себепден а дайым хайырланылгъан пасталаны бек зыбырларын алмагъыз.

Тири химия веществолары болгъан пасталада кючлю  окислительле бардыла, ала тишлеге тийгенде, кислородну эркин  радикаллары къураладыла, ала уа эмальны ичине киредиле,  бизни тишлерибизни сары неда боз бетли этедиле. Пигментле тишлени къаматсала, бетлери бузулады, тишле уа агъарадыла.

Акълагъан пастаны сайлай туруп, жаланда стоматолог  болушургъа боллукъду, ауузну, эмальны эм тиш этлени болумларына жаланда ол багъа бичаллыкъды.

-Сууукъ, исси ашдан да чанчытып башлагъан, къышны хауасына окъуна тёзмеген тишлени юслеринден не зат айтырыкъсыз, алагъа не зат жарашады?

- Аллай тишлени  жууучу пасталагъа эмальны бузмазгъа себеплик этген затла  къошуладыла, ала тишни  тыш къабугъу  бузулмай турууун жалчытадыла, аурутмай турурча да этедиле. Сёз ючюн, гидроксиапатит тишни эмалында жарылгъан жерчиклерин толтурады. Андан сора да, тиш пасталада стронцийни фториди,  стронцийни хлориди, фторидлени ионлары, кальцийни хлоридлери  бардыла.

Бу затла барысы да тишни тышында эмальны артыкъ сезимлиликлерин кетередиле.

Къысхасы, бек сезимли тишлеге деп жарашдырылгъан пастаны хайырланыргъа керекди, ол не къадар жумушакъ болса игиди. Андан сора да, пастаны воспалениягъа къажау багъыуда хайырланылгъан тюрлюсю болса игиди.

 - Бек къыйматлы пастала къайсыладыла?

- Бюгюнлюкде тиш пастала кёпдюле. Аладан бек къыйматлылагъа триклозанны-сополимерни мурдорунда жарашдырылгъанла саналадыла: ала бактериялагъа эм воспалениялагъа къажау багъыуда хайырланыладыла.

Быллай пастала бир жолгъа кёп тюрлю проблемаланы тамамларгъа болушадыла - кариесден, тишлеге жабышхан затладан, аууздан келген ийисден, бактерияланы жаратылыуларындан, эмальны къоруулаудан, тиш этлени къанауларындаy, эмальны жукъарыуундан, асыры сезимлиликден къутултадыла. Бу тюрлю пастала тишлени саулукъларын сакълауда эм къыйматлы дарманладыла

- Къышда тиш этлерибиз терк – терк ауруйдула. Не этерге боллукъду?

-Гингивитге эм пародонтитге къажау пастала бардыла, аланы профилактикача хайырланыргъа боллукъду. Ала тиш этлени къанауларын азайтадыла, аурууну, ачытыуну селейтедиле, воспаленияны кетередиле. Алагъа ферментле, витаминле, дарман хансла, антисептикле (триклозан эм хлоргексидин) киредиле.

Воспалениягъа къажау пастала  диабетиклеге (тишлери бек саргъалыучулагъа)  керекдиле. Сабий  сакълагъан тиширыула да ала бла хайырлансала игиди.

Триклозанны мурдорунда жарашдырылгъан пастала тиш этлени къанауларын эм кёпчюулерин кетередиле. Болсада   хлоргексидинлери болгъан пастала ауузда дисбактериозну чыгъарыргъа боллукъдула, тишлени бетлерин бузадыла, ашны татыуун тюрлендиредиле. Ана боллукъ тиширыулагъа да жарамайды аллай пасталаны хайырланыргъа, ала башха затланы табаргъа керекдиле.

-Баям, тишлени сабийликден сакъларгъа керекди.  Алай,  не кюрешсенг да, алагъа  къарап,  адамны тишлери атасы-анасыныкъылача болгъан  сунама. Огъесе терсми  оюм  этеме?

-Кертиди, бир-бир юйюрлени адамларыны тишлери  тап, башхаланы  уа  осалыракъ болгъаны  эслерчады. Алай игилени окъуна адам кеси бузаргъа боллукъду. Сёз ючюн, ашында  татлы-кёп, витаминле уа аз эселе. Жемишле, тахта  кёгетле, сют тишлеге кюч-къарыу бередиле. Адамны азыу эм артда чыкъгъан тишлери анасыны  къарынында болгъан заманыны къыркъ бешинчи кюнюнден башлап беш жылы толгъунчу айныйдыла. Ма аны ючюн бала сакълагъан тиширыуну ашы  витаминли  болургъа  керекди.

Азыу тишле сабийни алтыайлыгъындан башлап эки жыл  бла жарымына  дери ёседиле. Алай аны тишчиклери бир-эки айгъа кечирек чыгъып башласала да, къайгъырыргъа керекмейди. Алай жыл  бла эки  айлыгъында да бир зат окъуна  жокъ эсе уа, докторгъа  элтип кёргюзтюрге керекди.

-Адамны тишлерине  неда  ауузну  ичине  къарап, саулугъуну юсюнден зат айтыргъа  боллукъду?

-Сёз ючюн, аш орунну  язвасыны хатасындан ауузда  язвенный стоматит болады. Тишлери аман болуп, ашны кереклисича чайнаялмай эсе уа, адамны аш оруну, баууру, чегилери  ауруйдула. Неда адам СПИД-ден  ауруй эсе, аны  ауузунда  стоматит,  гингивит  болмай  амалы  жокъду.

Ауузда  хронический периодонтит ревматизм, артрит, полиартрит, эндомиокардит аурууланы  туудурургъа боллукъду. Къурт тишледе жыйылгъан микробла неда ауузда багъылынмагъан ауруула адамны къарыусуз этедиле, ол алгъынча тынчайып  жукъламайды, жюреги, башы ауруп  башлайды.

 Тишле саныбызны-чархыбызны бир кесегидиле.  Алагъа не къадар сакъ болсагъыз, ол къадар  саулукълу  боллукъсуз.